Ishibeni Ifya Kulanshanya!
1 Pa kubomba umulimo twapeelwa uwa kushimikila no kupanga abasambi, tufwile ukwebako bambi amashiwi. (Mat. 24:14; 28:19, 20) Ukulanshanya kuti kwayafya nangu fye ni ku fibusa. Cinshi cingatwafwa pa kwebako abo tushaishiba imbila nsuma?
2 Ukubapanga Icibusa: Esheni ukuimona nga balya bantu muletununuka mu butumikishi. Pa mulandu wa fyo ifintu fili mu calo, cintu cayeba ico bamo batunganishisha abo bashaishiba no kubatiina. Ici kuti cacilikila ukulanshanya. Bushe kuti mwacita shani pa kupwisha umwenso wa pa kubala ku bantu mushishibe? Nangu fye lintu tushilalanda icili conse, cimo icingatwafwa ukulanshanya fintu tulemoneka abapempenkana. Ukufwala kwesu ukwayana ne mimonekele yesu iya mucinshi filalenga ukufumyapo umwenso.—1 Tim. 2:9, 10.
3 Cimbi icingatwafwa ukulanshanya kutekanya, ukuba uwa bucibusa. Ici cilaafwa bambi ukutekanya no kukutika. Pa kucite ifi ukupekanya kusuma kulafwaikwa. Nga natwishiba bwino ico twalalanda, tatusakamikwa. Kabili uyu wine mutende wa muntontonkanya tukwata kuti walenga bambi ukuumfwa ubukombe bwesu. Ukulanda pa lwa kutandala kwa kwa Nte, umwanakashi umo atile: “Ico njibukisha pa lwa kumwentula kwakwe, fintu alemoneka uwa mutende. Nalicebushiwe.” Ici calengele umwanakashi ukukutika ku mbila nsuma.
4 Imibele Icebusha Bambi: Tulekabila ukulolekesha ne fya banensu mu kufumaluka. (Fil. 2:4) Inshila imo twingacitilamo ico kukanalanda sana ilyo tulelanshanya. Pantu pa kulanshanya kulaba no kukutika. Nga twaeba abalekutika ukuti na bo balandepo kabili twafwaisha ukukutika ku fyo balelanda, kuti bakutuluka ukuti tulabasakamana. E ico ilyo abo mulelanda nabo batendeka ukulanda, mwiyangufyanya ukubwelela ku fyo mupekenye. Batasheni mu bufumacumi, kabili lundenipo pa fyo bacilanda. Nga ca kutila ifyo balanda fyasokolola icili ku mutima wabo, aluleni ifyo mulelandapo no kutendeka ukulanda pa filebasakamika.
5 Ubufuuke no bupete e filenga ukulanshanya ukutwalilila bwino bwino. (Amapi. 11:2; Imil. 20:19) Abantu balepalama kuli Yesu pantu ali “uwafuuka kabili uwapetama umutima.” (Mat. 11:29) Kumfwa ku kuimona uwacindama, kulacilikila ukulanshanya. E ico, nangu line twalishininkisha sana ukuti ni fwe twaishiba icine, tatufwaya ukuumina kumo ilyo tulelanda.
6 Ni shani nga ca kuti ifyo umuntu alanda filelanga ifisumino fyapusana ne fyo Baibolo isambilisha? Bushe mulimo wesu ukumulungika? Ee, mu kuya kwa nshita, lelo tatufwile ukucite co pa muku wa kubalilapo. Ilingi line cilaba bwino ukulondolola bwino ico bonse twishibe ilyo tushilalanshanya ifisambilisho fya mu Baibolo ifyo uyo muntu engasanga ifyakosa ukusumina. Pa kucite co icikabilwa kutekanya no kushilimuka. Paulo ashile ica kumwenako cisuma pali uyu mulandu ilyo aleshimikila ku bapingushi ba ku Areopagi.—Imil. 17:18, 22-31.
7 Pali ifi fyonse, icikatwafwa sana ukwishiba ifya kulanshanya bwino kutemwa kwa cishinka. Nga Yesu, tufwile ukwikatilwa abantu inkumbu abali “nge mpaanga ishishaba na kacema.” (Mat. 9:36) Ici citulenga ukubatwalila imbila nsuma no kubafwa ukuba pa nshila ya ku mweo. Ubukombe bwesu bulanda pa kutemwa, e co shi natuleshimikila ubu bukombe mu kutemwa. Nga twacite co, ninshi tulepashanya Yehova Lesa na Yesu Kristu—abaishibisha ukulanshanya mu bubumbo bonse.