Shimikileni no Kushimikisha Ubunte

¹ Pamo nga “cilongoshi kabili mushika,” Yesu apekanishishe abasambi bakwe ku mulimo ukalamba uwa kushimikila untu bali no kubomba ku ntanshi. (Esa. 55:4; Luka 10:1-12; Imil. 1:8) Umutumwa Petro alondolwele ukutumwa Yesu abatumine muli aya mashiwi: “Atwebele ukushimikila abantu no kushimikisha ubunte ukuti E wasontelwe kuli Lesa ukuba kapingula wa bomi na bafwa.” (Imil. 10:42) Cinshi casanshiwa mu kushimikisha ubunte?

² Kuti twasambilile fingi pa kubebeta ica kumwenako ca mutumwa Paulo. Ilyo akumene na bakalamba bafumine ku cilonganino ca ku Efese, abacinkwileko ati: “Nshashimunwike ukumweba conse ica kumwafwa nangu ukumusambilisha pa bantu na ku ng’anda ne ng’anda. Lelo nashimikishe ubunte ku baYuda na ku baGriki ulwa kulapila kuli Lesa ne citetekelo muli Shikulwifwe Yesu.” Te mulandu na mesho alolenkene na yo, Paulo afwaile ukushimikila abantu abengi imbila nsuma. Tashimikile fye bakoomfwa wakwe icine ca kutendekelako epela, lelo alefwaya ukubafundisha “ukupanga konse kwa kwa Lesa.” Pa kuti apwishishishe ci, ali-itemenwe ukubombesha nga nshi no kuipusulako fimo. Asosele no kuti: “Nshimona umweo wandi ngo wacindama kuli ine, kano fye napwisho lubilo lwandi na bukapyunga ubo napokelele kuli Shikulu Yesu, ku kushimikisha ubunte imbila nsuma ya cikuuku ca bupe fye ica kwa Lesa.”—Imil. 20:20, 21, 24, 27.

³ Kuti twapashanya shani ica kumwenako ca kwa Paulo pali lelo? (1 Kor. 11:1) Ukupitila mu kusokota aba mu mayanda abawaminwa nangula ca kuti fwe bene twaliba na mafya, ukutukuta ukushimikile mbila nsuma ku bantu ba mitundu yonse ne ndimi, kabili mu kucincila ukusambilisha abalefwaya ukusambilila icine abo tusanga. (Mat. 10:12, 13) Ici cifwaya inshita, ukubombesha, no kutemwa bantu.

⁴ Bushe Kuti Mwabombako Bupainiya bwa Kwafwilisha? Mu March na mu April kuti yaba myeshi ishaiwamina iyo mwingashimikishamo ubunte pa kubombako bupainiya bwa kwafwilisha. Ala mwandini twalikoseleshiwe uyu mwaka wapwile ukumona kuntu abengi balebombesha muli bupainiya bwa kwafwilisha!

⁵ Nkashi uulwalilila sana uuli ne myaka 80 alicincimushiwe ku kukoselesha kupeelwa no kuteyanya kwa kwa Yehova. Alembele ati: “Kwabukulwile ukufwaisha kwandi ukwa mu mutima nakwata pa nshita yalepa, kabili kwalengele ng’umfwe ukuti mfwile fye ukubomba bupainiya bwa kwafwilisha na kabili umuku umo fye.” Apampamine pa kwisabombako mu March. Atile: “Ica kubalilapo ico nacitile, kwikala pa nshi no kupenda ifingapooswapo. Nalanshenye no mwana mukashana wandi pa lwa fyo natantike pantu nalekabila alengafwa. Alimpapwishe ilyo na o apokele formu wa kwipushishapo bupainiya bwa kwafwilisha.” Mu mweshi, uyu nkashi wa cikalamba abombele amaawala 52 mu butumikishi. Atile “Inshite shingi nalepepa kuli Yehova ukubukulula ubukose bwandi ilyo nayumfwile ukuti bwaletompoka. Pa mpela ya mweshi, nali ne nsansa sana kabili nalikushiwe, kabili nalitasha Yehova inshite shingi pa kunjafwa. Kuti nafwaya ukwesha na kabili.” Insansa akwete napamo kuti shakoselesha bambi abalefwaisha ukubomba bupainiya bwa kwafwilisha te mulandu no kulwalilila.

⁶ Munyina uo incito yapwile ukwabula ukwenekela ashukile iyo nshita ku kubombako bupainiya bwa kwafwilisha. Muli ulya mweshi, alipuutilwemo no kupimpa kwa kubomba umulimo wa kushimikila, kabili pa mpela ya mweshi, atendeke isambililo lipya ilya Baibolo. Ilyo aletontonkanya pa fyo abombele, atile: “Ulya mweshi waliweme nga nshi!” Aali ne nsansa sana pa kutungululwa no kwafwiwa na Yehova! Ca cine, Yehova apongolwelele ipaalo pa kubombesha munyina abombeshe mu butumikishi, kabili e fyo akamucitila na imwe.—Mal. 3:10.

⁷ Abengi tacabangukila ukubombako bupainiya bwa kwafwilisha. Nangu cibe fyo, te mulandu ne milimo ya ku ncito ne ya mu lupwa pamo pene na mafya ya pa lwabo, bamunyina na bankashi abengi baliba na maka ya kubomba. Ukushimikisha ubunte ilingi line kusanshamo ukupeela ilambo lya nshita yesu iyacindama na maka, lelo amapaalo yafumamo tayengalinganishiwako.—Amapi. 10:22.

⁸ Mu March na mu April ni nshita shisuma isha kubombamo bupainiya bwa kwafwilisha. Mu March muli impela sha milungu shisano. Ukushimikila muli ishi nshiku na mu cungulo bushiku lyonse pambi kuti kwalenga ababomba akasuba konse ukubomba bupainiya bwa kwafwilisha. Na kabili, nalimo kuti mwashimikila na pa nshiku sha mwikalwe mu mweshi wa April. Bamo nalimo kuti babomfya inshiku sha mwikalwe pa sukulu na ku ncito, ku kukumanisha amaawala yafwaikwa 50. Pa kutantika amaawala 50 mu butumikishi mu March nelyo mu April, bushe kuti mwabomfyako imo iya mitubululo ya kutantika ukubomba bupainiya bwa kwafwilisha iili muli cino cipande? Lanshanyeni imitantikile yenu na bambi; bamo ukwabula ukutwishika bakakoseleshiwa ukubomba na imwe mu butumikishi. Nga ca kuti tamwakabe na maka ya kubomba bupainiya bwa kwafwilisha, imikeni ubuyo muli iyi myeshi, kabili tungilileni bonse abakabombako bupainiya. Tantikeni bwino ino nshita ku kwingilishako imibombele mu March na mu April.

⁹ Tasheni pa Cibukisho: Cila mwaka mu nshita ya Cibukisho, ukutasha pa cilubula kulenga abengi ‘ukulubula inshita’ ya kubomba bupainiya bwa kwafwilisha. (Efes. 5:15, 16) Mu Zambia uyu mwaka wapwile, bapainiya ba kwafwilisha bali 6,462 mu March na 7,551 mu April. Ico calenga avareji ya iyi myeshi ibili ukuba 7,006. Linganyeniko na avareji ya 2,313 ababombele bupainiya bwa kwafwilisha mu mweshi umo umo mu mwaka wa mulimo uwapwile. Iyi nshita ya Cibukisho ni nshita na imbi iishaiwamina iya kulangilamo ukutasha kwesu ukwa cine cine pe lambo lya cilubula ilya kwa Kristu ukupitila mu kwingilishako imibombele yesu mu butumikishi bwa mwi bala.

¹⁰ Ilyo April 16 ilepalama, tontonkanyeni pa fyo Icibukisho cipilibula kuli imwe. Tontonkanyeni pa fya kucitika fyatangilile imfwa ya kwa Kristu ne fyo aapampamine ukucita mu mutima wakwe. Etetuleni na pa kusekelela kwabikilwe pa ntanshi ya kwa Yesu ne fyo kwamwafwile ukushipikisha ubuluku bwa musango yo. Tontonkanyeni pa lwa cifulo cakwe ca ndakai ngo Mutwe wa cilonganino, uwangalila umulimo wa kushimikila no kupanga basambi. (1 Kor. 11:3; Heb. 12:2; Ukus. 14:14-16) Lyene langeni ukutasha kwenu pali fyonse ifyo Kristu acita pa kubombako umulimo wa kushimikila ukufika apo imibele yenu ingamusuminisha.

¹¹ Koselesheni Bambi Ukushimikisha: Nga ca kuti baeluda na babomfi batumikila babombako umulimo wa bupainiya bwa kwafwilisha, kuti baba ne shuko lisuma ilya kukoselesha bambi. Ilyo balebomba na bakasabankanya mu butumikishi bwa mwi bala na lintu balecite fipempu fya bucemi, balakwata ishuko lishaiwamina pa lwabo ilya kwafwilisha bambi ukubombesha muli uyu mulimo waibela. Shi ifwe bonse natupepele uyu mulandu, ico cikalenga tukakoshe ukwikatana kwesu ukwa kubombesha ku kushimikisha ubunte.

¹² Nangu baeluda na babomfi batumikila bakabombela pamo ne mitantikile ya cilonganino ku kulundulula imibombele mu myeshi ya March na April, kangalila wa mulimo maka maka akangwa ku kwampanya umulimo wa kushimikila. Afwile ukuteyanya ukwa kukumanina pa kuya mu mulimo wa mwi bala, inshiku, ne nshita ingawamina icinabwingi ca bakasabankanya kabili afwile ukushininkisha ukuti ifi filebilishiwa lyonse. Kuti mwatantika nalimo ukulakumana imiku iingi mu bushiku bumo, pa kuti aba mu cilonganino bonse bengaba ne shuko lya kubombako imisango yalekanalekana iya kucitilamo ubunte. Iyi napamo kuti yasanshamo ukushimikila mu ncende ya makwebo, ukucitilo bunte mu misebo, ukushimikila ku ng’anda ne ng’anda, ukucite fipempu fya kubwelelamo, no kushimikila pa lamya. Na kabili, afwile ukushininkisha ukuti kuli impapulo, bamagazini abengi, ne ncende ukwa kushimikila muli iyo myeshi.

¹³ Tukatambika icitabo ca Ukwishiba mu March, kabili tukaba no buyo bwa kutendeka amasambililo ya Baibolo. Imitubululo isuma iya kubomfya pa kushalika icitabo ca Ukwishiba yali mu ca mu kati ica Ubutumikishi Bwesu Ubwa Bufumu ubwa January 2002. Mu April tukatambika bamagazini ba Ulupungu lwa kwa Kalinda na Loleni! Esheni ukubomfya imitubululo iyaba mu “Ifya Kulanda Pali Bamagazini.” Bonse bafwile ukulubulako inshita ya kupekanya bwino pa kuti bashimikishe ubunte.

¹⁴ Mwandini twalipaalwa pa kuti lintu tulebomba tutungululwa no Mutwe wa cilonganino, Kristu Yesu, kabili twaliba ne shuko lya kwebako bambi imbila nsuma! Ilyo imyeshi ya March na April ilepalama, lekeni tubwekeshepo ukubombesha ifyo tushabala atubombapo ilyo tuleumfwila ukukambisha kwa Kristu ukwa kushimikila no kushimikisha ubunte.

[Akabokoshi pe bula 4]

Inshila shalekanalekana Isha Kubombelamo Bupainiya bwa kwafwilisha mu March na mu April 2003

Ubushiku Amaawala

Pali Cimo 1 2 — — 2 —

Pali Cibili 1 — 3 — — —

Pali Citatu 1 2 — 5 — —

Pali Cine 1 — 3 — — —

Pali Cisano 1 2 — — — —

Pa Cibelushi 5 4 3 5 6 7

Pa Mulungu 2 2 3 2 2 3

March 56 56 54 55 50 50

April 50 50 51 53 — —

Bushe imo pali iyi mitantikile kuti yalinga kuli imwe?