‘Cipokeleleni’
1 Inshita imo, ilyo Yesu alelanda na basambi bakwe pa lwa kuupa, atile ubushimbe ‘ca bupe.’ Lyena atile: “Uwingacipokelela acipokelele.” (Mat. 19:10-12) Ilyo papitile imyaka, umutumwa Paulo alembele pa busuma bwa kubela umushimbe kabili akoseleshe bambi ukukonka ica kumwenako cakwe icakwikala ubushimbe. (1 Kor. 7:7, 38) Abengi ilelo ‘balipokelela’ ubushimbe kabili baleipakisha ifisuma fyaba mu bushimbe. Fisuma nshi fimo?
2 Ukubomba “Ukwabula Ukupusaulwa”: Paulo alyumfwikishe ukuti ubushimbe bwamulengele ukuba ne shuko lya kubombela Yehova “ukwabula ukupusaulwa.” Na lelo line, munyinefwe umushimbe kuti atinamina Isukulu lya Kukansha Ilya Butumikishi, kabili umushimbe ilingi line alaba no buntungwa bwa kutendeka umulimo wa bupainiya, ukusambilila ululimi lumbi, ukuya ukuli ukukabila kukalamba, ukubombela pa Bethel, nelyo ukubombako imilimo imbi iyaibela. Kuti asanga inshita iikulu na mashuko ya kobelwa ne sambililo lya pa lwakwe kabili kuti aetetula no kulanda sana na Yehova mwi pepo lya pa mutima. Umushimbe ilingi line alakwata inshita iikulu iya kuipeela umwine ku kwaafwa bambi. Iyi milimo yonse yabelako ukuti umuntu ‘amwenemo icisuma umwine.’—1 Kor. 7: 32-35; Imil. 20:35.
3 Ukubombela Lesa ukwa musango uyu ukwabula ukupusaulwa kulaleta amapaalo ayengi. Pa numa ya kwikala imyaka 27 mu Kenya, nkashi umushimbe alembele ati: “Nalikwete abanandi abengi ne milimo iingi! Twalecitila ifintu pamo [kabili] twaletandalishanya. . . . Nabomfeshe ubuntungwa bwa kuba umushimbe na mayendele ku kubomba ubutumikishi, kabili ici calindetela insansa ishingi.” Kabili atile: “Pa myaka yapita Yehova aba ni cibusa wandi sana.”
4 Ukubomfya Bwino Inshita ya Bushimbe: Yesu atile umuntu alingile ukwikalila ubushimbe “pa mulandu wa bufumu bwa mu muulu.” (Mat. 19:12) Filya fine ubupe bubomfiwa bwino, e fyo no bushimbe bwine bulingile ukubomfiwa bwino pa kuleta insansa ne filambu. Pa kushukila amashuko yafuma mu bushimbe no kushintilila pali Yehova ukuti abapeele amano no bukose, abashimbe abengi balyumfwikisha ubucindami bwa kupokelela ici ca bupe.