Ukushimikila mu Calo umo Ifintu Fyaluka-aluka
1 Ifintu filaaluka lubilo lubilo! Mu nshita fye inono, ubusanso ubulengwa ne fyabumbwa pe sonde, ubwafya bwa mikalile, ifimfulunganya fya mapolitiki, nelyo ubusanso bwasabankanishiwa konse konse kuti fyaba e fintu fya kulandapo. Na bantu bene mu nshita fye inono kuti bapoosa amano kuli fimbi. (Imil. 17:21; 1 Kor. 7:31) Muli cino calo umo ifintu fyaluka-aluka, kuti twacita shani pa kulenga abantu bafwaye ukukutika ilyo tulelanda na bo pa bukombe bwa Bufumu?
2 Ilukeni Ifibasakamike: Inshila imo iya kulenga abantu bafwaye ukukutika kulanda pa filecitika. Pa nshita imo, ilyo Yesu alefwaya bakoomfwa wakwe ukutontonkanya sana pa kwampana kwabo na Lesa, alandile pa tuyofi twacitike uto baletontonkanyapo. (Luka 13:1-5) Na ifwe bene, ilyo tuleshimikila imbila nsuma, kuti twalanda pa fyalandilwe mu lyashi pa mulabasa nelyo pali cimo icacitika icikumine aba mu cifulo tushimikila. Lelo, pa kulanda pa fintu ifikumine ku mapolitiki, tufwile ukucenjela pa kuti tatulecita kwati natutemwapo ulubali lumo.—Yoh. 17:16.
3 Kuti twaishiba shani ifyo abantu baletontonkanya pali yo nshita? Napamo inshila yawamisha kwipusha fye icipusho e lyo no kukutika. (Mat. 12:34) Ukwangwa abantu kukatulenga ukwishiba imitontonkanishishe ya bambi no kubomfya umucenjelo pa kwipusha na fimbi. Ifyo mwine ng’anda alumbula pa kulanda kuti fyasokolola ifisakamike abene mayanda abengi muli yo ncende kabili kuti fyapeela ishuko lya kushimiko bunte.
4 Ukupekanya Ifya Kusosa: Pa kupekanishisha umulimo wa mwi bala muli cino calo caluka-aluka, kuti twabomfya icitabo ca Ukupelulula. Imitubululo ingatwafwa ukusanshamo ifilecitika mu mishimikilile yesu yalitantikwa pa mabula 10-11, pa mitwe itila “Imisoka/Ukucingililwa” na “Ifiponako fya Nomba Line.” Ifyebo fyapalako kuti fyasangwa mu Ubutumikishi Bwesu Ubwa Bufumu ubwa September 2000, ibula 4. Ilyo mulepekanya ifya kulanda pa kushimikila, shininkisheni ukuti mwasanshamo ilembo lyalinga.
5 Ilyo tuleangwa ku fisakamika abantu uko tushimikila ifyaluka-aluka, tufwile ukuteulula imishimikilile ya mbila nsuma ukulingana ne fyo fintu. Nga tulecite fyo, ninshi tulelanda na bantu pa fibakumine icine cine. Ico cilenga twa-afwa abengi ukwishiba Uo imibele yakwe ne fipimo fyakwe fishaluka.—Yako. 1:17.