Landeni pa Filecitika Ifingalenga Abantu Ukufwaya Ukumfwa
1 Bushe kuti mwatemwa inshila shisuma isha kushimikililamo ishingalenga ubutumikishi ukukanatendusha kabili ishingalenga abantu ukufwaya ukumfwa ubukombe bwa mu Baibolo? Lyene pa kutendeka ukulanshanya, landeni pa filecitika mu calo e lyo no ko kwine mwikala. Kuti mwalanda pa filecitika ndakai mu mwenu nelyo mu fyalo fimbi. Ifi fintu filaaluka umo shacela. (1 Kor. 7:31) Moneni ifya kumwenako fyakonkapo.
2 Amafya ya ndalama no mutengo wa fintu filasakamika abantu icine cine. Kanshi, kuti mwatila:
◼“Bushe mwacumfwako ilyashi pa mulabasa ukuti balelunda umutengo wa [lumbuleni co cintu] na kabili?” Nelyo kuti mwalanda pa lwa bulofwa nga ca kuti akampani kakalamba nakafumya ababomfi abengi ncito. Ukulingana fye na fintu mulefwaya ukulandapo mu kukonkapo, kuti mwakonkanyapo ukwipusha ati “Bushe mwalitontonkanyapo umulandu cakosela ukusanga umwa kuliila?” nelyo kuti mwaipusha ati “Bushe muletontonkanya ukuti lyonse cakulakosa ifi fine pa kusanga umwa kuliila?”
3 Ukulanshanya kumbi kuti kwatendekela pa malipoti ya lukaakala, pamo nga imbuli mu ndupwa nelyo pa kati ka bana ba masukulu. Kuti mwaipusha amuti:
◼“Bushe mwalibelengele mu nyunshipepala bulya busanso [lumbuleni ubusanso bwacitike uko mwikala]?” Lyene ipusheni amuti “Bushe muleti cinshi cilenga ulukaakala lwafulishe fi mu calo?” nelyo amuti “Bushe muletontonkanya ukuti kukabe nshita ilyo twakulaenda ku matwi tondolo?”
4 Ilyashi pa lwa lyeshi lyaonawile fintu, ifinkukuma, nelyo ifimfulunganya mu fyalo fyapusanapusana na fyo fintu mwingalandapo nga mulefwaya aba kumfwa. Ku ca kumwenako, kuti mwaipusha amuti:
◼“Bushe Lesa e ulenga [lumbulenipo akayofi kamo]?” Nelyo kuti mwalanda pa cimfulunganya ca nomba line no kutila: “Nga ca kuti bonse bafwaya umutende, mulandu nshi wayafisha ukusanga?”
5 Lyonse beni abapempwila ku filecitika ifyo mwingalandapo pa kutendeka ukulanshanya. Imitubululo ingabomba bwino yaba mu citabo ca Ukupelulula pa kamutwe katila “Ifiponako fya Nomba Line,” pa mabula 10-11. Lelo, mu fya mapolitiki talukeni ku kutungililapo imitekele imo, na mu fya mikalile talukeni mu kuipoosa mu fikansa fyabo. Lelo, imwe landeni sana pa Malembo na pa Bufumu bwa kwa Lesa ukuti e bukapwishishisha fye amafya ya bantunse.