Bwelelako Uko Wasangile Ubuseko
1 Abengi aba ifwe twalikwata ukutunguluka mu kwananya bamagazini no kupoko kulembesha. Calibe cacindama ukuti twabwelelako no kwesha ukubimbula ubuseko bwalundwako. Ukutunguluka kwesu mu kucite co kuti pambi kwashintilila pa fyo tuipekanya bwino pa ntanshi tatulacita icipempu ca kubwelelamo.
2 Ibukisho kuti abantu abafulisha bayumfwa ukuti amabutotelo yonse ne fyakaniko fyalikwata ulufungulo kwi pusukilo. Ulwafuma Ulupungu lwa kwa Kalinda ulwa May 1, 1994, nalukwata ifipande ifilebebeta nampo nga ubutotelo ubuli bonse kuti bwasekesha Lesa. Ifi fipande filepeela ukushilimuka ukwingaafwa abantu ukwishiba ifipimo fya kwa Kabumba ifya kupepa.
3 Nga ca kuti washalike uyu kope wa “Ulupungu lwa kwa Kalinda,” kuti pambi wapanga ukukonkeshapo pa kutambika ukulembesha. Kuti watila:
◼ “Ulwafumine ulwalekelesheko namushilile lwakwete ifipande pa mutwe wa lyashi uwa butotelo.” Lyene ipusha ukuti: “Cinshi caba e nshila yalinga iya kupepelamo Lesa? [Leka ankuleko.] Baibolo itusambilisho kuti ukupepa kwa cine cine kwashimpwa mu kwishiba kwalungikwa. Bushe mwalishiba cintu kasesema mukalamba Yesu Kristu inshita imo aebele umwanakashi umwina Samaria ukukuma ku kupepa Lesa?” [Belenga Yohane 4:22.] Pa numa ya kwasuka ukufuma kuli mwine ŋanda ipusha ifipusho fyakonkapo: “Bushe ici, nakalimo, e fyo cingaba na kuli imwe? Bushe mwalisambilishiwa ukuti Lesa Wa maka yonse alikwata ishina lya pa lwakwe, Yehova? (Amalu. 83:18) Kabili nga ca kuti muilanguluka mwe bene ukuba Umwina Kristu, bushe kuti mwalondolola ifisumino fyenu ukufuma mu Malembo? Pa kupokelela magazini wa Ulupungu lwa kwa Kalinda lyonse, mukafwilishiwa ukunonka ukwishiba kwalungikwa ukwa Cebo ca kwa Lesa.” Lyene tambika ukulembesha.
4 Kuti pambi wapingulapo ukubomfya inshila imbi iya kutambikilamo kulembesha muli iyi nshila:
◼ “Naliipakishe ukulanshanya kwesu ukwipi umuku wafumako pa lwa nshita ya ku ntanshi iya lino isonde. Bushe kuti mwaelenganya ifyo ubumi bukaba pano lintu Lesa akaleta impela ku bubifi no kucula? Moneni fintu Amalumbo 37:9-11 yalondolola imifwaile ya kwa Lesa kwi sonde. [Belenga.] Pa myaka iingi, Ulupungu lwa kwa Kalinda lwalilosha ukusakamana kwa bakabelenga ba luko ku cintu Ubufumu bwa kwa Lesa bukacitila umutundu wa muntu.” Lyene, pa numa ya kuleta ukusakamana ku cishinka ca kulungatika mu lufumine ulwa nomba line, tambika ukulembesha.
5 Lintu wabwelelako, nakalimo ukeluko kuti mwine ŋanda alapokelela ifitabo fya butotelo bwakwe bwine kabili ayumfwo kuti ico calikumanina. Kuti watila:
◼ “Te mulandu no butotelo bwesu, bonse tulakumwako ku bwingi ubwa masakamika yamo yene—imisoka, ukulwala kwabipisha, ukusakamikwa kwa mu njikalo—bushe te fyo? [Leka alandepo.] Bushe muleyumfwa ifyo kwalibako ukupikulula kwine kwine kuli ishi mpika? [Belenga 2 Petro 3:13.] Imifwaile ya fitabo fyesu yalilondololwa pe bula 2 ilya Ulupungu lwa kwa Kalinda. [Belenga isentensi lisobwelwemo limo nelyo yabili.] Abantu abengi abashili Inte sha kwa Yehova balaipakisha ukubelenga impapulo shesu pa mulandu wa bukombe bwe subilo buntu shakwatamo, ubwashimpwa pali Baibolo.” Nga ca kuti ukwankulako kwa kwa mwine ŋanda kuli ukusuma, londolola programu wesu uwe sambililo lya Baibolo.
6 Kuti pambi wabomfya iyi nshila:
◼ “Umuku wafumineko nali pano, twalandile pa lwa masubilo ya calo cesu aya nshita ya ku ntanshi. Muletontonkanyapo shani pali uyu lipoti? [Lumbulapo ilyashi lya nomba line ilili ilya kwangwako.] Lintu abantu bomfwa ifintu fya musango yo, cibalenga ukutwishika kuntu icalo cilelola, bushe te fyo? Ifwe twasumina ukuti ifintu fya musango yo filanga ukuti tuleikala mu ‘nshiku sha kulekelesha’ ishasobelwa muli Baibolo pali 2 Timote 3:1-5.” Pa numa ya kubelenga ifishinka fikalamba, kuti waipusha nga ca kuti alimonapo abantu abalinga ubo bulondoloshi. Twalilila no kulanshanya pali kamo aka tumitwe tunono pa mabula 171-6 mu citabo ca Ukupelulula.
7 Nga ca kuti twapekanya bwino no kulanga ukufwaisha kwa cine cine ukwa kwaafwa, kuti twaba abacetekela ukuti aba mitima ya bufumacumi bakakutika.—Yoh. 10:27, 28.