Bwelelako Kuntu Washalike Bamagazini
1 Yesu akoseleshe abakonshi bakwe ukubombela pa kupanga abasambi. (Mat. 28:19) Ico cipilibula icacila pa kushalika fye ifitabo; tulefwaya ukwaafwa abantu ukulunduluka lwa ku mupashi. Pa kucite co tufwile ukubwelelako ku kupayanya ukwafwilisha kwalundwako kuli abo abalangisha ubuseko.
2 Nga ca kuti waebekeshe icipande cimo muli umo uwa bamagazini pa kutandala kobe ukwa kubalilapo, kuti caba icisuma ukulanshanya umutwe umo wine lintu wabwelelako:
◼ “Lintu natandele umuku walekelesheko, nayalwilile ukusakamana kwenu ku cipande mu Ulupungu lwa kwa Kalinda (nelyo Loleni!) icatwafwile ukutesekesha ukukabila kwa kubebeta Baibolo. Imifwaile ya kwa Lesa iya nshita ya ku ntanshi iyawaminako yashimpwa pali kamfulumende wa Bufumu bwakwe. Mika 4:3, 4 alemba ubulayo bwakwe ukuti ubu Bufumu bukaleta impela ku nkondo shonse.” Pa numa ya kubelenga ili lembo, tambika ukulembesha.
3 Nga ca kuti ubuseko bwa kwa mwine ŋanda bwamoneka ukuba ubunono nelyo nga ca kuti takwete inshita ku kulanshanya, kuti wapingulapo fye ukulunda ishina lyakwe ku mpito shobe isha magazini:
◼ “Apantu mwalumbulwile ubuseko muli bamagazini namushilile umuku walekelesheko, nacitontonkanya ifyo kuti mwaipakisha aba abafuma abapya. Ndesubila mukasanga ici cipande maka maka ukuba ica kulengo buseko.” Langisha icipande ico uleyumfwa ukuti cikaba ica kucebusha kuli wene. Tubulula ukubwelelako na bakafuma abakakonkapo.
4 Nga ca kuti mwine ŋanda alibelengele bamagazini kabili alilumbulwile ukutasha pa lwa bene, kuti pambi watambika ukulembesha auti:
◼ “Apantu mulemoneka ukuipakisha Ulupungu lwa kwa Kalinda, ndi uwa buseko ukulamuletela abafuma abapya ilyo baisa. Nga mwingatemwa, kuti namutantikila bene ukulatumwa kuli imwe lyonse ukupitila mu melu pa kuti mwingaba abashininkisha ukukwata ulwafuma ululi lonse.” Nelyo kuti pambi wasosa fye ukuti: “Ulupungu lwa kwa Kalinda lukamwaafwa ukubebeta ifipona mu calo ilyo filefikilisha amasesemo ya Baibolo. Luleta ubukombe bwa kusansamusha ubwa kuti mu kwangufyanya fye Ubufumu bwa kwa Lesa bukalwila ili sonde muli paradise wayembesha. Kuti mwapokelela abafuma babili aba uyu magazini cila mweshi pa mwaka utuntulu pali . . . (Lumbula umusangulo wa lyonse.).”
5 Nga ca kuti washalike magazini lelo tawakwete ishuko lya mu nshita ilya kutambika ukulembesha, pekanya ukucite co pa cipempu ca kubwelelamo.
Ku ca kumwenako, nga ca kuti washalike magazini ku muntu wa butotelo, kuti pambi watendeka pa kusoso kuti:
◼ “Cilawama ukusanga abantu abacili abasekelela muli Baibolo. Cimoneko kuti abengi balanguluka Baibolo nge citabo fye na cimbi. Pamo nga kabelenga wa Cebo ca kwa Lesa, bunonshi nshi bubomba ubo ubukombe bwa iko bwaleta ku bumi bwenu?” (Lintu mwine ŋanda ayankulako, kutika mu kusakamanishisha kabili landa pa fishinka fyashininkishiwa.) Kuti lyene walanda ukuti ilintu abantu abengi balabelenga Baibolo, balafilwa ukunonkelamo pa mulandu wa kukanaumfwikisha ico babelenga, kabili lundako kuti: “Ulupungu lwa kwa Kalinda lwaliba lwa kwaafwa kuli ine mu kunonka ukumfwikisha kwawaminako ukwa Cebo ca kwa Lesa. Na kuba, amamilioni balisango kuti lwalingilishako apakalamba ukumfwikisha kwabo ukwa Baibolo.” Lyene langisha mwine ŋanda icishinka ca kulengo buseko muli magazini. Sondwelela pa kusoso kuti: “Ndi uwa nsansa ukutambika ukulembesha kwa Ulupungu lwa kwa Kalinda, ukukasanshamo abafuma 24 pali . . . (Lumbula umusangulo wa lyonse.).”
6 Twalikwata bamagazini balekanalekana. Fwayamo ifishinka fya kulengo buseko muli uyo ulepekanya ukubomfya. Cikakwaafwa ukukoselesha abafumaluka ukusambilila ifyafulilako pa lwa fintu Yesu akambishe.—Mat. 28:20.