Ukutasha Bambi Kulakosha
1 Pa nshita ya kusendama, umukashana munono aipwishe banyina uku aleshinshimukila ati: “Bushe na leelo nacilufyanya?” Ico cipusho capapwishe banyina. Nangu ca kuti balimwene ifyo umwana wabo aeseshe na maka ukuicindika ubo bushiku, tabamutashishe nangu fye panono. Ukushinshimukila kwa ulya mwana kulingile ukucinkulako ifwe bonse ukuti tulakabila ukutashiwa—nampo nga tuli baice nelyo abakalamba. Bushe tulakosha bambi pa kubatasha pa fisuma bacita?—Amapi. 25:11.
2 Abena Kristu banensu balilinga ukutashiwa. Baeluda, ababomfi batumikila, na bapainiya balabombesha mu milimo yabo. (1 Tim. 4:10; 5:17) Abafyashi bakapepa balabombesha ukukusha abana babo mu mibele ya kwa Yehova. (Efes. 6:4) Abacaice ba Bwina Kristu balashomboka pa kuti bakaane “umupashi wa pano calo.” (1 Kor. 2:12; Efes. 2:1-3) Bambi babombela Yehova mu busumino te mulandu no kutantalila kwa mushinku, ukulwalilila, nelyo ifya kwesha fimbi. (2 Kor. 12:7) Aba bonse balinga ukutashiwa. Bushe tulatasha pa milimo yabo iyo tulingile ukubatashishapo?
3 Lungatikeni Ukutasha: Bonse tulatemwa icine cine ukuumfwa baletutasha capamo nge cilonganino. Lelo, ukutasha kulacilapo ukukosha nga ca kuti batutasha mu kulungatika. Ku ca kumwenako, mu cipandwa 16 ica kalata Paulo alembeele abena Roma, alilungatike ukutasha abengi pamo nga Febi, Priskila na Akula, Trufaena na Trufosa, na Persida. (Rom. 16:1-4, 12) Amashiwi yakwe yafwile yalikoseshe nga nshi balya bantu ba busumino! Ukutasha kwa musango yo kulashinina bamunyinefwe ne nkashi ukuti tulabakabila kabili kulatupalamika capamo. Bushe mwalitashapo bamo mu kulungatika nomba line?—Efes. 4:29.
4 Ukufuma ku Mutima: Pa kuti ukutasha kukoshe bambi, kufwile kwaba kwa cishinka. Abantu kuti baishiba nga ifyo tulesosa filefuma ku mutima nelyo ‘tuletasha fye muli bubumbimunda pa lulimi.’ (Amapi. 28:23) Ilyo tuleisambilisha ukumona ifisuma muli bambi, umutima wesu ukakuntwa ukubatasha. Shi natuletasha sana mu cishinka, pa kwishiba ukuti ‘icebo mu nshita iyene iya ciko caliwama!’—Amapi. 15:23.