Langeni Ukuti Mulasakamana Abantu Bambi—Pa Kubatasha

¹ Ukutasha abantu mu bufumacumi, kuti kwalenga babombela pa fintu ifyo bafwile ukubombelapo, kabili kuti kwabasansamusha. Ico bakasabankanya abengi basanga ca kuti nga batasha umuntu uo basanga mwi bala mu bufumacumi mu mashiwi fye ayanono, alafwaya ukukutika ku bukombe. Bushe kuti twacita shani nga tulefwaya ukutasha abantu ilyo tulebila imbila nsuma?

² Mulebikako Amano: Ilyo Yesu Kristu abwelelemo ku muulu alibikileko sana amano ku milimo ya filonganino cinelubali ifyali mu Asia Minor. (Ukus. 2:2, 3, 13, 19; 3:8) Na ifwe nga ca cine cine twalibika amano ku bantu tusanga mu mulimo wesu tukafwayapo fimo pali bena ifyo twingabatashishapo. Ku ca kumwenako, kuti twatasha abantu pa kusunga bwino ulubansa, kuti twatasha umufyashi pa citemwiko cakwe ku bana, nelyo kuti twatasha umwine wa ng’anda pa kutusansamukila ilyo twaya pa mwakwe. Bushe mulabikako sana amano pa kuti mumone ifyo mwingatashishapo abantu?

³ Mulekutika: Ilyo muleshimikila abantu, mulebepushako fimo ifingabafwa ukulanda ifili mu mutima. Nga mulebakutika ilyo balelanda ninshi namubacindika. (Rom. 12:10) Mu fyo balelanda kuti mwaumfwamo fimo ifyo mwingabatashishapo kabili kuti mwatendeka ukulanshanya na bo pali fyo fine balanda.

⁴ Muleiluka: Cinshi tufwile ukucita nga ca kuti umwine wa ng’anda alanda ifipusene ne cine ca mu Baibolo? Mu nshita ya kutampa ukukansana no mwine wa ng’anda pa fyo alufyenye, mutasheni pa kulanda icili mu mutima, kabili kuti mwamweba amuti, “Kanshi ca cine mwalitontonkanyapo sana pali ili lyashi.” (Kol. 4:6) Nangu umuntu ali ne fikansa, kuti twamutasha pa kufwaisha ukusambilila. Nga twaba abanakilila ku bantu nge fi, nangu tabalefwaya kumfwa ku mbila nsuma, limbi kuti basuka banaka bakutikako.—Amapi. 25:15.

⁵ Nga tulefwaya abantu bakoseleshiwe pa fyo tulebatashishapo, tufwile ukubeeba ifya cine. Nga tulebakoselesha ifyo, kuti twacindika Yehova kabili kuti twalenga abantu balafwaisha ukumfwa ubukombe bwa Bufumu.