Ukulundulula Bucibusa bwa pa Mutima na Yehova
1. Finshi nkashi umo aishileiluka pa lwa mibombele yakwe iya ku mupashi?
1 Nkashi Umwina Kristu umo asumine ati, “pa myaka napamo 20 naleya ku kulongana no kubomba ubutumikishi bwa mwi bala. Lelo nshalecite fyo no mutima onse.” Lelo, akonkanyapo ati: “Ninjiluka nomba ukuti nangu line ifi fintu fyalicindama, te fyeka fye fingankosha ilyo ifintu fyatendeka ukwafya. . . . Nomba ninjishiba ukuti mfwile ukwalula imitontonkanishishe yandi no kutampa isambililo lya pa lwandi ilya kunonsha pa kuti nkeshibe Yehova bwino no kumutemwa no kutasha pa fyo Umwana wakwe atupeela.”
2. Mulandu nshi cacindamina ukulundulula bucibusa bwa pa mutima na Yehova?
2 Pa kuba na bucibusa bwa pa mutima na Yehova kano mwabombesha. Te kubomba fye ifya Bwina Kristu epela. Nga tulefilwa ukulanshanya na Yehova lyonse, mu kuya kwa nshita kuti aba kwati ni cibusa wa kale uo twaleka ukulanshanya nankwe. (Ukus. 2:4) Natubebete ifyo isambililo lya Baibolo ilya pa lwesu ne pepo fingatwafwa ukulundulula bucibusa bwa pa mutima na Yehova.—Amalu. 25:14.
3. Bushe isambililo lya pa lwesu lifwile ukuba shani pa kuti litupalamike kuli Lesa?
3 Ipepo no Kwetetula Fyalicindama: Isambililo lya pa lwesu ilinonsha umutima te lya kushila fye ifishinka fikalamba mu fyebo tulesambilila no kubelenga amalembo yalimo. Tufwile no kutontonkanya pa fyo ifyebo tulebelenga filesokolola pa nshila sha kwa Yehova, ifipimo fyakwe, ne mibele yakwe. (Ukufu. 33:13) Ukumfwikisha ifintu fya ku mupashi kulatufika pa mitima no kutulenga ukutontonkanya pa bumi bwesu. (Amalu. 119:35, 111) Ilyo tulesambilila pa lwesu tufwile ukwiminina pa kupalama kuli Yehova. (Yako. 4:8) Isambililo linonsha likabila inshita ne cifulo calinga, kabili pa kuti isambililo libe ilya lyonse, kano namuilama. (Dan. 6:10) Nangu ca kuti mwalipamfiwa, bushe mulalubulako inshita cila bushiku ukwetetula pa mibele ya kwa Yehova iyawamisha?—Amalu. 119:147, 148; 143:5.
4. Bushe ukupepa ilyo tatulatendeka isambililo lya pa lwesu kutwafwa shani ukulundulula bucibusa bwa pa mutima na Yehova?
4 Ipepo lya kufuma ku mutima lyalicindama pe sambililo lya pa lwesu ilya kunonsha. Pa kuti icine ca mu Baibolo citukunte ku mitima no kutulenga “[ukubombela] Lesa umulimo washila . . . pamo na katiina ka bukapepa no kututuma,” tukabila umupashi wa mushilo uwa kwa Lesa. (Heb. 12:28) E ico, lyonse ilyo tuletendeka isambililo, tulingile ukulomba Yehova ukutupako umupashi wakwe. (Mat. 5:3) Ilyo tuletontonkanya pa Malembo no kubomfya ifya kwafwa ukusambilila ifyapekanishiwa no kuteyanya kwa kwa Yehova, tulapongolwela ifya mu mitima yesu kuli Yehova. (Amalu. 62:8) Ukucite fi pa kusambilila kwaba kupepa, no ku kupepa e mo tulumbwila ukuipeelesha kwesu kuli Yehova no kukosha ukukakatila kwesu kuli wene.—Yuda 20, 21.
5. Mulandu nshi cacindamina kuli ifwe ukwetetula pa Cebo ca kwa Lesa cila bushiku?
5 Nga fintu ciba kuli bucibusa bonse, bucibusa bwesu na Yehova bufwile ukuteeswa lyonse nga buli no kutwalilila ukulunduluka mu bumi bwesu bonse. E ico, kanshi natulelubulako inshita cila bushiku iya kupalama kuli Lesa, pa kwishiba ukuti, na o, akapalama kuli ifwe.—Amalu. 1:2, 3; Efes. 5:15, 16.