Umulimo Utungililwa na Lesa
1 Pa bantu ba kwa Lesa leelo abasambilila banono sana, ababa ne cuma na bo banono, kabili tabalumbuka mu bwikashi bwa ndakai. Ici e cilenga abantu abengi ukukaana ubutumikishi bwesu pantu batontonkanya ukuti tabwacindama. (Esa. 53:3) Lelo, umulimo tubomba uwa kusambilisha Baibolo walisansamusha abantu abengi mwi sonde no kubapeela isubilo. Cinshi calenga abantu yaweyawe ukupwishishisha umulimo ushaikulila ifi? Ni co Lesa alabatungilila. (Mat. 28:19, 20; Imil. 1:8) Umutumwa Paulo alondolwele ukuti: “Lesa asalile ifyanaka fya pano calo, ku kulenga ifyakosa fikatwe nsoni.”—1 Kor. 1:26-29.
2 Abatumwa na Bena Kristu bambi aba kubalilapo bali “abashasambilila kabili abantu yaweyawe.” (Imil. 4:13) Lelo, mu kushipa babombele umulimo bapeelwe uwa kushimikila imbila nsuma, kabili Yehova apaalile ukubombesha kwabo. Te mulandu na mafya nelyo ukukaanya, ‘icebo ca kwa Yehova catwalilile ukukula no kucimfya mu maka.’ Takwali icacilikile umulimo pantu waletungililwa na Lesa. (Imil. 5:38, 39; 19:20) Ici e cacitika na mu nshiku shesu. Imbila nsuma ilatwalilila ukucimfya no kukula ica kuti nangu fye ni bakateka bakwatisha amaka balifilwa ukuicilikila.—Esa. 54:17.
3 Umucinshi Upeelwa Kuli Lesa: Apo twalikwata ishuko lya kuba abatumikishi ba kwa Lesa, bushe tulingile ukuitakisha? Iyo. Ilyo alelanda pa butumikishi bwa Bwina Kristu, Paulo alembele ati: “Tuli ne cuma ici mu fipe fye bumba, ukuti amaka yacila aya lyonse yabe aya kwa Lesa kabili te yantu yafuma kuli ifwe.” (2 Kor. 4:7) Paulo alishibe ukuti ali no kubomba umulimo wakwe pantu Lesa alimupeele amaka.—Efes. 6:19, 20; Fil. 4:13.
4 Na ifwe bene twalishiba ukuti tulepwishishisha umulimo wa kushimikila pantu ‘twalipokelela ukwafwa ukufuma kuli Lesa.’ (Imil. 26:22) Ukupitila muli uku kubilisha kwa mwi sonde lyonse, Yehova aletubomfya ukutensha inko mu nshila ya kupapusha—icilelangilila ukuti ubupingushi bwaluma buli no kwisa mu kwangufyanya. (Hag. 2:7) Mwandini twalishuka ukuba “bakabomba banankwe aba kwa Lesa” mu kulobolola kwacindamisha ukwa ku mupashi!—1 Kor. 3:6-9.