Muletootela
1 Nangu tuleikala mu “nshita shaibela ishayafya,” fingi fitulenga kutootela kuli Yehova. (2 Tim. 3:1) Ne co tutootelela sana kuli wena, ca bupe atupeela ica mutengo sana, Umwana wakwe. (Yoh. 3:16) Na kabili, ilyo aba mu mipepele ya bufi bali ne nsala ya ku mupashi, ifwe tulaipakisha ifya kulya fishaifulila ifya ku mupashi. (Esa. 65:13) Tuli babwananyina abaikatana aba mwi sonde lyonse kabili twalipeelwa ishuko ilisuma nga nshi ilya kulundulula ukupepa kwa cine. (Esa. 2:3, 4; 60:4-10, 22) Bushe kuti twalanga shani uku kutootela kuli Yehova pa kutupeela aya mapaalo yashaifulila?—Kol. 3:15, 17.
2 Umulimo Wawamisha uwa Kubomba no Mutima Onse: Ilyo umutumwa Paulo alelanda pa kupeela ifikwatwa, atile: “Lesa atemwa uupeela ne nsansa.” (2 Kor. 9:7) Nelyo fye ni mu kubombela Lesa, ici cishinte cilakonkwa. Tulanga ukuti tulatootela kuli Lesa nga twatemwisha icine, nga tulesekelela ilyo tuli pa kulongana kwa Bwina Kristu nelyo nga twalipimpa mu mulimo wa kubila. Na kabili tulalanga ukutootela ilyo tusansamuka pa kupwishishisha ukufwaya kwa kwa Lesa.—Amalu. 107:21, 22; 119:14; 122:1; Rom. 12:8, 11.
3 Mu Israele wa pa kale Ifunde talyabapimine fya bupe baali no kutuula ilyo baletuula ifya bupe fimo. Umo umo alelanga ukuti alatootela kuli Lesa pa kupeela “umwabele paalo lya kwa Yehova” ilyo apokelele. (Amala. 16:16, 17) Na leelo line, nga tulatootela apakalamba tukacincishiwa ukubombesha ukufika apo twingapesha mu mulimo wa Bufumu uwa kubila no kupanga abasambi. Lyonse mu lusuba ishuko tuba na lyo ilya kutootela kuli Yehova lilalundwako. Bamo balapoka cuti ku ncito nelyo ku milimo yabo imbi pa kuti bapoosa nshita ikalamba mu mulimo wa kubila, nelyo ukubombako bupainiya bwa kwafwilisha. Na imwe kuti mwabombesha mu mulimo wa kubila.
4 Abaisulamo Ukutootela: Ipepo, e nshila ya cindamisha iyo tulangilamo ukutootela kuli Yehova. (1 Tes. 5:17, 18) Icebo ca kwa Lesa citucincisha ‘ukwisulamo icitetekelo mu kutootela.’ (Kol. 2:7) Nangu natupamfiwa nelyo tuli na mafya, tulingile ukutootela kuli Yehova mu mapepo yesu aya cila kasuba. (Fil. 4:6) Shi ‘natufushisho kutootela ukwingi kuli Lesa’ mu mapepo yesu na mu mulimo wesu uwa kubila.—2 Kor. 9:12.