Tuletasha Pa Co Twakwata
1 “Lesa asokololo kututemwa kwakwe kwine, pa kuti ilyo twali tucili ababembu Kristu alitufwilile.” (Rom. 5:8) Fintu ifwe bonse tulingile ukuba aba kutasha pali ili lambo lyapulamo ilyacitilwe na bonse babili Yehova Lesa no Mwana wakwe pa mulandu wesu! Ukupitila mu mulopa wasumiwe uwa kwa Kristu, twalipeelwa ishuko lya mu nshita ku kukwata ubumi bwa muyayaya, icintu cimo ico takuli umuntunse uwingatupeela.
2 Ni shani fintu twingalangisha ukutasha kwesu? Kuliko abantu abengi abali ne cilaka ca kwishiba kwa cine, ukwingasangwa fye mu Cebo ca kwa Lesa Icashila. Caba kufwaya kwa kwa Yehova ukuti bafike ku kwishibe cine. (1 Tim. 2:4) Tulangisha ukutasha kwesu pali ici cine ukupitila mu “kubile mbila nsuma ya bufumu bwa kwa Lesa.” (Luka 4:43) Ukwakanamo kwa mutima onse muli uyu mulimo kulangisha ifyo tulatasha ukuti Kristu alitufwilile no kuti tufwaya ukumupashanya pa kumfwila ukukambisha kwakwe muli bucishinka ukupanga bambi ukuba abasambi.—Mat. 28:19, 20.
3 Ni nshila nshi shimo isha kushimikilamo ishaisuka kuli ifwe? Bushe kuti cacitikako kuli ifwe ukulembesha nga bapainiya ba kwafwilisha ukufuma ku nshita ne nshita? Pa numa ya kupende fipooswa, bamo kuti pambi basendako umulimo wa bupainiya bwa nshita yonse. Pa kushukila aya mashuko ya mu nshita ayashaiwamina, kuti twaingilishako icipimo ca nshita tupoosa mu kwananya imbila nsuma ya Bufumu. Mu nshita shapita kuti pambi walilangulwike pa lwa kulembeshako bupainiya, lelo kwaliko ifipindami. Napamo imibele yobe nayaluka. Nga ni fyo, bushe walitontonkanyapo mu kukatama pa kwingila mu mulimo wa bupainiya nelyo pa kubombako nga painiya wa kwafwilisha?
4 Ukutasha kwesu kulakulilako lintu twalolesha pa cilecitika ukutushinguluka. Mu kusaalala kwa calo ulukaakala, ulupato, ne fikansa fileingilishiwako. Paulo alondolwele bwino inshita shesu pamo nge “shakakala” kabili “ishayafya ukubomba na sho.” (2 Tim. 3:1, NW) Pa kati na nkati ka iyi ine mibele ya kubombomanika, twalikwata imbila nsuma mu kupaka ku kwakana na bambi. Twalikwata bamagazini bashaiwamina babili, Ulupungu lwa kwa Kalinda na Loleni! Aba bamagazini kuti baletako ukupembesula kwa cine cine ku babelenga bene. Uno mweshi tuletambika ukulembesha kwa Ulupungu lwa kwa Kalinda. Ukutasha pa co twakwata kulingile ukutukunta ukuba bakapekape pa kwakana aba bamagazini na bambi.—Heb. 13:16.
5 Tuletasha Yehova pa kutupayanishisha bapainiya ababombesha. Mu filonganino fimo kuti mwabamo bapainiya abafimba ififulo fyabo ifya kubombelamo libili libili. Aba musango yo kuti pambi balangulukapo, nge mibele yasuminisha, ukuyabombela mu ncende ya muli cino calo umulekabila ukwaafwa icine cine. Kangalila obe uwa muputule kuti pambi akwatako imitubululo ukukuma kuli uyu mulandu.
6 Kwalibako imilandu iingi iya kubela aba kutasha pa co twakwata, ifintu fisuma ifyapaka icine cine. Ukutasha kwesu kuli Yehova kuti kwalumbululwa bwino ukupitila mu kwishibisha ishina lyakwe ne mifwaile kuli bambi.—Esa. 12:4, 5.