Beni no Mupashi wa Bupainiya
1. Kuti mwalondolola shani umupashi wa bupainiya?
1 Bakasabankanya bonse aba Bufumu kuti baba no mupashi wa bupainiya nampo nga ni bapainiya pali ino nshita nangu iyo. Balobelwa nga nshi mu mulimo batumwa uwa kushimikila no kupanga abasambi. (Mat. 28:19, 20; Imil. 18:5) Balasakamana abantu bambi kabili balaipusula ifingi pa kuti fye babombe uyu mulimo. (Mat. 9:36; Imil. 20:24) Ababomfi ba kwa Yehova balaitemenwa ukubomba na maka yabo yonse ku kwafwa bambi ukusambilila icine. (1 Kor. 9:19-23) Natusambilile pali umo uwali no mupashi wa musango yo, e kutila kabila wa mbila nsuma Filipi.
2. Baeluda na babomfi batumikila kuti bapashanya shani ukupimpa kwa kwa Filipi mu butumikishi?
2 Ukushimikila no Kusambilisha: Filipi alebomba imilimo yacindama nga nshi mu cilonganino ca mu mwanda wa myaka uwa kubalilapo. (Imil. 6:1-6) Lelo, umulimo ukalamba akwete wali wa kubile mbila nsuma mu kupimpa. (Imil. 8:40) E ico pali leelo, ilyo baeluda na babomfi batumikila balesakamana imilimo yabo, kuti baba no mupashi wa bupainiya pa kutungulula mu kucincila umulimo wa kushimikila. Ici cilakusha nga nshi umupashi usuma uwa cilonganino!—Rom. 12:11.
3. Kuti twaba shani no mupashi wa bupainiya ilyo tule-eshiwa?
3 Pa numa ya mfwa ya kwa Stefani, ukupakaswa kukalamba kwaletele amafya ku basambi. Lelo Filipi atwalilile ukushimikila, kabili e wabombele ulubali lukalamba mu kushimikila abena Samaria. (Imil. 8:1, 4-6, 12, 14-17) Kuti twapashanya ica kumwenako cakwe pa kutwalilila ukushimikila imbila nsuma ilyo tule-eshiwa na pa kushimikila kuli bonse twakumanya ukwabula akapaatulula.—Yoh. 4:9.
4. Ca kumwenako nshi twingasambilila ku misambilishishe ya kwa Filipi?
4 Filipi alishibe bwino ifya kusambilisha Icebo ca kwa Lesa. Icishininkishe ci lyashi lya kwa mutungwi umwina Etiopia. (Imil. 8:26-38) Ukwishiba ifya kubelenga Baibolo no ‘kupelulula mu Malembo’ e nshila na imbi iya kubelamo no mupashi wa bupainiya. (Imil. 17:2, 3) Ukupala Filipi, na ifwe tufwaya ukushimikila imbila nsuma konse uko abantu bengasangwa na pa nshita fye yonse.
5. Cinshi cingafwa abafyashi Abena Kristu ukukusha umupashi wa bupainiya mu bana babo?
5 Ulupwa ne Cilonganino: Ukwabula no kutwishika imibele ya kwa Filipi ne ca kumwenako cakwe fyalyambukile abana bakwe abanakashi. (Imil. 21:9) Ukupalako, abafyashi Abena Kristu abaobelwa nga nshi ne fya ku mupashi balakoselesha abana babo ukucita cimo cine. Nangu ca kutila balanaka ku milimo ya mu kati ka mulungu, abafyashi abashimikila imbila nsuma mu kupimpa kuti bayambukisha uko kupimpa kumo kwine ku mwana wabo ica kuti nangu akula akatwalilila ifyo fine.—Amapi. 22:6.
6. Kuti twalanga shani ukuti tulatasha pa kuba na bapainiya mu cilonganino cesu?
6 Filipi ali ne cileela kuli Paulo na kuli Luka, Abena Kristu bapimpa abalebombesha mu mulimo wa kwa Yehova. (Imil. 21:8, 10) Kuti twalanga shani ukuti tulatasha no kutungilila abapikintika mu kushimikila pali leelo? Napamo kuti twaitemenwa ukubomba na bapainiya ulucelo nelyo icungulo kasuba ilyo abengi bashifumina mu butumikishi. (Fil. 2:4) Kuti twabalaalika fye na ku mayanda ku mwesu ku kuipakisha ukubishanya kwa kukuulilila. Te mulandu ne mibele yesu, shi ifwe bonse tubombeshe ukuba no mupashi wa bupainiya.