Sungeni Ilinso Lyenu Ilituntulu
1. Ukuba ne linso ilituntulu kwalola mwi, kabili cinshi kwacindamina?
1 Mu Lyashi lyakwe ilya pa Lupili, Yesu apoosele sana amano ku fyo ilinso lya mampalanya nelyo ilya ku mupashi lingasonga imikalile yesu. Atile: “E co ilinso lyobe nga lituntulu, umubili obe onse ukaba umwabuuta; lelo nga ilinso lyobe lya bubifi, umubili obe onse ukaba umwafiita.” (Mat. 6:22, 23) Ilinso ilituntulu ni lilya litonta pa kucita icintu cimo, e kutila ukucita ukufwaya kwa kwa Lesa kabili talipumbulwa ku masakamika yashalinga aya kukonkelela ifikwatwa. (Mat. 6:19-21, 24-33) Cinshi cingatwafwa ukusungilila ilinso ilituntulu?
2. Bushe Icebo ca kwa Lesa citukoselesha ukulamona shani ifikwatwa?
2 Lundululeni Ukutekanya: Ukusakamana bwino aba mu ng’anda lifunde lya mu Malembo ilyo tufwile ukukonka. (1 Tim. 5:8) Lelo ici tacilepilibula ukuti lyonse tulekonkelela ifintu ifisuma kabili ifipya. (Amapi. 27:20; 30:8, 9) Amalembo yatucincisha ukuteka imitima pa kuba ne “fya kulya ne fya kufwala no mwa kwikala,” e kutila ifintu ifyo tukabila lyonse. (1 Tim. 6:8; Heb. 13:5, 6) Ukumfwila uku kupanda amano kuti kwatwafwa ukutonta ilinso pa fya ku mupashi.
3. Finshi fikatwafwa ukukanaitwika ifisendo fishalinga?
3 Kuti cawama sana nga twataluka ku kuitwika icisendo ca kukongole ndalama icikongolekongole ne ca kukwata ifipe nelyo ukukonkelela ifintu ifikalatusendele nshita ikalamba. (1 Tim. 6:9, 10) Kuti twacita shani ifyo? Ilyo muletontonkanya pa kucita fimo, tala pepeni, kabili bebeteni bwino bwino nga ca kuti ifyo mulefwaya ukucita fikalamupusula ku kukonkelela ifya ku mupashi. Pampamineni pa kutangisha ifya ku mupashi mu mikalile yenu.—Fil. 1:10; 4:6, 7.
4. Mulandu nshi tulingile ukufwailisha inshila sha kwangushishamo imikalile yesu?
4 Angusheni Imikalile Yenu: Na cimbi icingamwafwa ukukanakonkelela ifikwatwa, kufwailisha inshila sha kwangushishamo imikalile yenu. Munyinefwe umo asangile kuti ulupwa lwakwe kuti lwaikala fye bwino nga ca kuti taluli ne fikwatwa ifingi kabili atile: “Nomba ndaafwa sana bamunyinane mu cilonganino. Nalishininkisha ukuti Yehova alapaala ababomfi bakwe bonse nga batangishako ukupepa kwa cine ukucila ifyo batemwa.” Bushe teti mwangusheko imikalile yenu no kuipakisha amapaalo ayengi nga nshi?
5. Cinshi tulingile ukubombesesha pa kuti tusungilile ilinso lyesu ilituntulu?
5 Lyonse tulingile ukulabombesha pa kuti tukaane ukusonga kwa kwa Satana, ukwa bwikashi bwa muli cino calo ukwa kufwaisha ukuba ne fyuma, e lyo no kwa kukanapwililika kwesu. Ukucila ukuleka amenso yesu yalelubantika, natutonte amenso pa kucita ukufwaya kwa kwa Lesa na pe subilo lyesu ilishaiwamina ilya kuba no bumi bwa muyayaya.—Amapi. 4:25; 2 Kor. 4:18.