Ifyo Tufwile Ukusunga Ilinso

● Ilinso lyesu lyalipangwa bwino. Lelo lyalicila na pa busuma. Lyalikwata amaka. Icitabo ca Visual Impact, Visual Teaching catila “amapesenti 40 aya mishipa sha mu menso shafuma kuli bongobongo.”

Yesu Kristu alilungike ilyo atile ilinso “lubuuto lwa mubili.” Pa kulondolola ifyo apilibwile akonkenyepo ati: “E ico . . . amenso yobe nga yalolesha fye pa cintu cimo [icisuma], umubili obe onse ukaba umwabuuta; Lelo nga amenso yobe yalolesha pa fibi, umubili obe onse ukaba umwafiita.” (Mateo 6:22, 23) Aya mashiwi ya kwa Yesu, yaletwafwa ukumona amaka ilinso lyakwata, ukuti ifyo tumona kuti fyakuma ifyo tutontonkanya, ifyo tumfwa ne fyo tucita. Ukutontonkanya pa fisuma kulalenga umuntu aaba mu lubuuto; lelo ukutontonkanya pa fyabipa kulalenga umuntu aba umwafiita.

Ku ca kumwenako, moneni amashiwi ya kwa Yesu ayaba pali Mateo 5:28, 29: “Onse uwatwalilila ukulolekesha umwanakashi no kumukumbwa, ninshi nacita kale ubucende nankwe mu mutima. E ico kanshi ilinso lyobe ilya ku kulyo nga lilekulenga ukulufyanya, lilobole [ukulanda kwa mampalanya].” Aloseshe mwi? Ilinso ililolesha pa fibi kuti lyalenga umuntu alatontonkanya pa fyabipa, ica kuti nga atwalilila ukutontonkanyapo kuti asuka acita ubulalelale na bucibusa bwakwe na Lesa kuti bwapwa.—Yakobo 1:14, 15.

Caliwama ukuilama, nangu ca kuti ukucita ifyo takwayanguka, nga filya cingakosa kulobola ilinso! Bushe ukuipakisha kwa pa kashita akanono e kwingawama ukucila ukwisakwata umweo wa muyayaya?

Ifyo amenso yamona kuti fyalenga twalafwaisha ukukwata ifingi. E mulandu wine Baibolo itusokela ukuti ‘ulunkumbwa lwa menso, talwafuma kuli Shifwe, lelo lwafuma muli ici calo. Na kuba, ici cine calo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.’—1 Yohane 2:16, 17.

Bushe ifyo Baibolo ilanda fyalicilamo? Iyo! Nga twasuula ifyo Baibolo ilanda kuti twaba na mafya kabili te kuti tube ne nsansa. (Galatia 6:7, 8) Ukumfwila ifyo Icebo ca kwa Lesa cilanda pa fyo tufwile ukusunga ilinso lya mampalanya, kuti kwalenga twaba ne nsansa. Yesu atile: “Abapaalwa ni abo abomfwa no kukonka icebo ca kwa Lesa!” (Luka 11:28) Icacilanapo ukuwama ca kuti, balikwata isubilo ilya kwikala pe sonde ku ciyayaya, lelo ababa ne mibele yabipa nelyo abafwaya ukukwate ifingi tababa ne nsansa kabili tabakakwate umweo wa muyayaya.