Langeni Ukuti Mulasakamana Abantu Bambi—Pa Kubalolesha pa Menso
1 Ilyo tuleshimikila abantu ku cintubwingi na ku ng’anda ne ng’anda, ilingi line tulatala twabalolesha pa menso ilyo tatulatampa ukulanda na bo. Muli iyo iine fye nshita iinono, kuti twaishiba ifyo baletontonkanya pa kubatandalila e lyo ne fyo bali ubo bushiku ku fyo balecita pa menso. Na bo bene kuti bamona ifyo tuli. Umwanakashi umo alandile ifi pa kutandala kwa kwa Nte umo, atile: “Ico ndeibukisha pali uyu mwanakashi ca kuti alemwentula e lyo kabili alemoneka uwa mutende. Nalefwaya ukwishiba ico aendeele.” Calengele uyu mwanakashi akutika ku mbila nsuma.
2 Ukulolesha abantu pa menso, ni nshila isuma iya kutendekelamo ukushimikila abantu mu musebo nelyo mu fifulo fimbi ifya cintubwingi. Munyina umo alalolesha abantu abaleisa ku ntanshi pa menso. Nga abalolesha, alamwentula no kubatambika bamagazini. Ukucite fi kulenga alalanshanya bwino na bantu abengi kabili alashalika impapulo ishingi.
3 Ilukeni Ifyo Bambi Baletontonkanya: Ukulolesha abantu pa menso kukamwafwa ukwiluka ifyo baletontonkanya. Ku ca kumwenako, nga ca kuti umuntu tomfwile ifyo tulandile nelyo talesumina ifyo tulelanda, kuti amoneka pa menso. Nga ca kuti napamfiwa nelyo atendwa ukukutika, kuti twamona ku fyo alemoneka pa menso. Lyena kuti twaishiba ifya kulanda nankwe nelyo kuti twaipifya fye ilyashi lyesu. Nga twaishiba ifyo bambi baletontonkanya no kucitapo cimo ninshi tulelanga ukuti twalibasakamana.
4 Ubufumacumi no Kushininwa: Mu ntambi ishingi, ukulolesha umuntu pa menso cilangilila ukuti umuntu alelanda mu bufumacumi. Moneni ifyo Yesu acitile ilyo abasambi bakwe bamwipwishe icipusho ca kuti: “Nga kanshi nani uwingapusuka?” Baibolo itila: “Ilyo Yesu abaloleshe pa menso, atile kuli bene: ‘Ku bantu ici tacingacitwa, lelo kuli Lesa fyonse kuti fyacitwa.’” (Mat. 19:25, 26) Ukwabula no kutwishika ukushininwa kwa kwa Yesu ukwamonekele pa menso kwalengele ifyebo fyakwe ukubafikapo. Na ifwe nga tulelolesha abantu pa menso mucinshi mucinshi tukashimikila abantu imbila ya Bufumu mu bufumacumi no kushininwa.—2 Kor. 2:17; 1 Tes. 1:5.