Twalilileni Ukucincila!
1 Yesu alishibe ukuti inshita akwete iya kupwishishisha umulimo wa kwa Wishi pano isonde naicepa. (Yoh. 9:4) E ico alicincile ukubomba umulimo wakwe, kabili akanshishe abasambi bakwe ukubomba mu nshila imo ine. (Luka 4:42-44; 8:1; 10:2-4) Ifikwatwa tafyacindeme sana kuli wena. (Mat. 8:20) Ici e calengele ukuti Yesu apwishe umulimo uo Yehova amupeele.—Yoh.17:4.
2 Inshita Naicepa: Inshita ya kubila imbila nsuma “pano isonde ponse” na yo ine naicepa. (Mat. 24:14) Ukusesema kwa mu Baibolo kulondolola ukuti tuleikala mu kati na nkati ka nshiku sha ku mpela. Nomba line fye abantu “bashaishiba Lesa na bashinakila imbila nsuma iya kwa Shikulwifwe Yesu . . . bakamono kukandwa kwa bonaushi bwa muyayaya.” (2 Tes. 1:6-9) Ubo bupingushi bukesa mu kupumikisha kabili bukabo bwa kusungusha. (Luka 21:34, 35; 1 Tes. 5:2, 3) E ico abantu balekabila ukwishiba ukuti bali mu bwafya. Kanshi, mulimo wesu ukwafwa aba bantu ukufwaya Yehova ilyo kucili inshita.—Sefa. 2:2, 3.
3 Ukubomba Ukufika Apo Twingapesha: Apo balishiba ukuti ‘inshita iyashalako naipipa,’ Ababomfi ba kwa Lesa babiko mulimo wa kushimikila intanshi. (1 Kor. 7:29-31; Mat. 6:33) Abantu bamo mu kuitemenwa balikaana amashuko yakalamba aya kukwata icuma mu bwikashi e lyo ne milimo imbi iyo balefwaya ukucita, pa mulandu fye wa kufwaya ukulundulula umulimo wa kubila imbila nsuma. (Marko 10:29, 30) Bambi na bo balatwalilila ukuba “abacincila pe mu mulimo wa kwa Shikulu” te mulandu na mafya ya mutatakuya ayo bapitamo. (1 Kor. 15:58) Abengi balibila imbila nsuma pa myaka iingi ukwabula kupungaila. (Heb. 10:23) Cine cine Yehova alicindika nga nshi uku kuipeela kwabo mu kwafwilisha umulimo wa Bufumu.—Heb. 6:10.
4 Ubumi bwesu bufwile ukushimpa pa kupepa Yehova, ukusanshako no mulimo wa kubila, kabili ico cilatwafwa ukwibukisha ukuti ubushiku bwa kwa Yehova nabupalama. Kulatucingilila na ku kunapumfyanishiwa ku calo ca kwa Satana kabili kulakosha umupampamina wesu uwa kuba ne myendele ya mushilo. (2 Pet. 3:11-14) Cine cine ukubomba umulimo wesu abacincila kuti kwatupususha e lyo no kupususha bambi abo tushimikila.—1 Tim. 4:16.