Ulubali 12—Ukutungulula Amasambililo ya Baibolo Ayalunduluka
Ukwafwa Abasambi Ukutendeka Amasambililo ya Baibolo no Kulayatungulula
1 Ilyo abasambi besu aba Baibolo batendeka ukuya mu mulimo wa mwi bala, kuti baba no mwenso wa kutendeka amasambililo ya Baibolo no kulayatungulula. Bushe kuti twabafwa shani ukukanaba no mwenso?—Mat. 24:14; 28:19, 20.
2 Ilyo umusambi wa Baibolo afikapo ukuba kasabankanya ushabatishiwa, ilingi line ninshi alilembesha kale mwi Sukulu lya Butumikishi Ilya Bulesa. Ukusambilila ukupekanya no kulanda mwi sukulu kukamwafwa ukwishiba ifyo engasambilisha bwino pantu e cifwaikwa ku “mubomfi uushingaba na ca kukwatilapo insoni, uulungika bwino icebo ca cine.”—2 Tim. 2:15.
3 Sambilisheni ku Micitile Yenu: Yesu asambilishe abasambi bakwe ukupitila mu kubalangilila bwino bwino ifya kucita no kucita fyonse ifyo alelanda. Atile: “Onse uwasambilishiwa bwino akaba nga kasambilisha wakwe.” (Luka 6:40) Icacindama sana sana kulapashanya Yesu mu kulacita ifyo mulesosa ilyo muli mu mulimo. Ilyo umusambi wenu alemona ifyo mulebomba bwino, akeshiba bwino sana ukuti icikalamba ico tupempwila abo twalanshenye na bo, kutendeka ukusambilila na bo Baibolo.
4 Mulondolweleni ukuti ilyo twaeba umuntu ukuti tulefwaya ukulasambilila nankwe, tatufwile ukulondolola fyonse fye ifyo tucita pa kusambilila na bantu. Ilingi cilawama ukubalangilila fye ifyo ciba pe sambililo ukubomfya paragrafu imo nelyo yabili mu lupapulo tubomfya pa kusambilila. Ifyebo fimbi ifingamwafwa ukutendeka amasambililo fili pe bula 8 muli buno bwine Ubutumikishi Bwesu Ubwa Bufumu e lyo na mu bwa January 2002, pe bula 6.
5 Nga calinga, kuti mwaeba umusambi ukuya na imwe ku masambililo yambi aya Baibolo nelyo kuti aya na kasabankanya umbi uwaishiba bwino uyu mulimo. Kuti alandapo pali paragrafu imo nelyo pe lembo limo ililelanda sana pa cishinka mwi sambililo. E ico mu fyo umusambi alemona, kuti asambilila ifingi pa fyo engatungulula amasambililo ya Baibolo ayalunduluka. (Amapi. 27:17; 2 Tim. 2:2) Mutasheni, kabili mwebeniko umo alekabila ukuwamyako.
6 Ukusambilisha bakasankanya bapya ukuba bakasambilisha wa Cebo ca kwa Lesa kukabafwa ukubomba ‘umulimo usuma’ uwa kutendeka amasambililo no kulayatungulula. (2 Tim. 3:17) Ala cilomfwika bwino ukubombela pamo na bo mu bwite bushaiwamina ubwa kuti: “Onse uulefwaya abuule amenshi ya bumi aya bupe fye”!—Ukus. 22:17.