Bileni Ubukata bwa kwa Yehova
1 Kemba wa malumbo atile: “Imbeni kuli Yehova, mwe ba pano isonde bonse. Londolweleni ubukata bwakwe mu nko, ifipesha amano fyakwe mu bantu na bantu bonse.” Ilyo tuletontonkanya pa fyo Yehova aacita, ifyo alecita, ne fyo akatucitila, imitima yesu ilatucincisha ukubila ubukata bwakwe!—Amalu. 96:1, 3.
2 Mu Butumikishi: Inte sha kwa Yehova balikwata ishuko lya kwitilwa kwi shina lya kwa Lesa no kulilumbanya mwi sonde lyonse. (Mal. 1:11) Balipusana sana na bashimapepo ba mu Kristendomu, abaituumika ica kuti bafumya ne shina lya kwa Lesa mu maBaibolo yabo! Umulimo wa kulenga ishina lya kwa Lesa ukwishibikwa ufwile ukubombwa bwangu, pantu abantu balingile ukulilila kuli ili shina mu citetekelo pa kuti bakapusuke ubucushi bukalamba ubuleisa. (Rom. 10:13-15) E lyo kabili pa kuti pano calo pabe umutende na bekala calo na bo babe no mutende, kano ishina lya kwa Lesa lyashishiwa. Cine cine, imilimo ya kwa Lesa yonse yalyampana ne shina lyakwe.
3 “Yehova mukulu kabili awaminwo kutashiwa apakalamba.” Lelo pa kuti abantu ‘batuutubwile Yehova ubukata bwe shina lyakwe,’ bafwile ukwishiba icine pali ena. (Amalu. 96:4, 8) Lelo bambi balakaana ukuti Lesa takwaba. (Amalu. 14:1) Bamo balamuseebanya abati takwata maka, nelyo abati tasakamana abantunse. Nga tuleyafwa abafumaluka ukwishiba Kalenga wesu bwino bwino no kwishiba ifyo afwaya ukucita, e lyo ne mibele yakwe iisuma, ninshi tulelumbanya Yehova.
4 Ku Myendele Yesu: Ukukonka amafunde ya kwa Yehova ayalungama kulenga Yehova ukucindikwa. Abantu balamona imyendele yesu iisuma. (1 Pet. 2:12) Ku ca kumwenako, ubusaka bwesu ne mimonekele yesu iisuma filenga bambi ukututasha, kabili ico cilatupeela ishuko lya kulanda pa busuma bwa kukonka ifishinte fya mafunde yaba mu Cebo ca kwa Lesa. (1 Tim. 2:9, 10) Ala tulomfwa bwino ilyo bambi ‘bamone milimo yesu iisuma no kucindika Shifwe uwaba mu muulu’!—Mat. 5:16.
5 Ku fyo tulanda ne fyo tucita cila bushiku, shi natulumbanye Lesa wesu uwapulamo. Nga twacite fyo ninshi tuleankula ku bwite bwa nsansa ubwa kuti: “Imbeni kuli Yehova, cindikeni ishina lyakwe; bileni ukupususha kwakwe akasuba na kasuba.”—Amalu. 96:2.