Ififuma mu Mulimo Wesu
1. Bushe Lesa amona shani umulimo wesu, kabili abantu bankulako shani?
1 Icebo ca kwa Lesa cilondolola Abena Kristu ukuti baya balecimfya mu mulimo wa kwa Yehova, kwati bali pa kwenda kwa kucimfya. (2 Kor. 2:14-16) Ilyo tulesambilisha abantu pali Lesa, ififuma mu mulimo wesu fiba nge cena cisuma kuli Yehova. Abantu bamo balakonkelela ubusuma bwa mbila nsuma; e lyo bambi na bo balakaana. Lelo te kutila abengi nga bakaana ninshi tapali icilecitwa mu mulimo wesu. Moneni ififuma mu mulimo wesu.
2. Bushe ubutumikishi bwesu butwafwa ukulanga cinshi?
2 Ukucindika Yehova: Satana atila abantu babombela fye Yehova pa mulandu wa bukaitemwe. (Yobo 1:9-11) Umulimo wesu uwa Bwina Kristu utupeela ishuko lya kulanga ukuti twaliipeela kuli Yehova ukufuma pa nshi ya mutima. Bakasabankanya abengi balitwalilila ukuumfwila icipope ca kushimikila abantu no kupanga abasambi nangu ca kutila bali na mafya nelyo abantu tabalekutika. Ukutwalilila ukushimikila ilyo ifintu fili fyo, kulenga umutima wa kwa Yehova ukusekelela!—Amapi. 27:11.
3. Cinshi cacindamina ukutwalilila ukulenga ishina lya kwa Lesa ne fyo akacita ukwishibikwa?
3 Umulimo wesu ulenga no kuti ukufwaya kwa kwa Lesa kucitwe. Yehova alanda pa bonaushi buleisa ubwa calo ca kwa Satana, atila: “Inko shikeshibo kuti ni ne Yehova.” (Esek. 39:7) Pa kuti inko shishibe ico cintu, ababomfi bwa kwa Lesa bafwile ukutwalilila ukushimika pe shina lyakwe ne fyo afwaya ukucita “ku luko lonse no mutundu no lulimi na bantu.”—Ukus. 14:6, 7.
4. Bushe umulimo wa kushimikila waba shani apa kupingwila abantu?
4 E po Bakapingwilwa: E lyo kabili imbila nsuma iyibilwa, e yo abantu bakapingwilwapo. Umutumwa Paulo atile Yesu Kristu akaleta icilandushi “pa bashaishiba Lesa na bashinakila imbila nsuma iya kwa Shikulwifwe Yesu.” (2 Tes. 1:8, 9) Abantu bakapingwilwa pa fyo bankula ku mbila nsuma. We mulimo ukucindama uo Abena Kristu bapeelwa! Kanshi tatufwile ukuleka ukubila ubukombe bwa Bufumu ubuleta ipusukilo pa kuti twikapeelwa umulandu wa mulopa.—Imil. 20:26, 27.
5. Bushe umulimo wesu ulanga shani uluse lwa kwa Lesa?
5 Umukoosha wesu uwa kwafwa abantu banensu ukusenaminwa kuli Lesa cilangililo ca kuti Yehova wa luse. (1 Tim. 2:3, 4) Ifi twaishiba ukuti imikalile ya bantu ilaluka-aluka, tulaya kuli bena libili libili ku kubakoselesha ukufwaya Yehova ilyo kucili inshita. Ilyo tulecite fyo, tulanga “inkumbu sha kwa Lesa wesu” ‘uushifwayo muntu nangu umo ukonaulwa, lelo ukuti bonse bafike ku kulapila.’—Luka 1:78; 2 Pet. 3:9.
6. Busuma nshi tusanga mu kubombela Yehova lyonse?
6 Ubusuma Tusangamo: Ukubombela Lesa lyonse kulatucingilila. Kulatwafwa ‘ukulolela no kulaibukisha ukubapo kwa bushiku bwa kwa Yehova’ no kukanaikantaika ku fya mu bwikashi buno. (2 Pet. 3:11-14; Tito 2:11, 12) Kanshi natube “abashangila, abashitelententa, abacincila pe mu mulimo wa kwa Shikulu,” apo twalishiba ukuti umulimo wesu uwa Bwina Kristu te wa fye.—1 Kor. 15:58.