Langeni Ukuti Mulasakamana Abantu Bambi—Pa Kuba Aba Mutembo
1 “Yehova wa mutembo.” (Amalu. 145:8, NW) Nangu line e Mfumu Yapulamo, wa cikuuku, alalangulukilako, kabili wa mucinshi ku bantu abashapwililika. (Ukute. 13:14; 19:18-21, 29) Kuti tulebila bwino imbila nsuma nga twaba no mutembo nga filya Lesa aba. (Kol. 4:6) Pa kuti tumupashanye tatufwile fye ukuba abanakilila no kuba aba mucinshi pa kulanda.
2 Ku Ng’anda ne Ng’anda: Bushe kuti twacita shani nga ca kutila twatandalila umuntu pa ng’anda pa nshita ishilingile nelyo ilyo ali ne milimo sana ica kuti takwete ne nshita ya kulanda na ifwe? Nga twailuka ukuti inshita twamutandalila taiweme kabili napamfiwa twilefya ilyashi. Tumwebe fye ukuti tukabwela ubushiku bumbi. Nga ca kutila abantu bakaana ukupokako impapulo shesu tatufwile ukubapatikisha. Nga tulalangulukilako bambi tukacindika ifipe fyabo, kuti twalanga ukuti natucindika ifipe fyabo nga tuleisalako geti ne fiibi. Tufwile no kufunda abana besu ukulacita cimo cine. Tufwile ukushininkisha ukuti impapulo shonse isho tushiila abashiba pa ng’anda tashilemoneka ku bapita nshila. Cine cine, umutembo ukalenga tulecita ku bantu ifyo twingatemwa bena ukucita kuli ifwe.—Luka 6:31.
3 Ukushimikila mu Musebo: Ilyo tulebombela mu musebo, kuti twalanga ukuti tuli ba mucinshi nga tatulecinga abantu mu musebo e lyo no kukanaiminina abengi pa mwinshi we tuuka. Tukalanga ukuti tulelangulukilako bambi nga tulelanda fye na bantu abakwete inshita ya kulanda na ifwe, ukucila ukulanda na balemoneka fye apabuuta tuutu ukuti nabapamfiwa. Limo limo, pa mulandu wa congo mu musebo, tufwile ukukosha ishiwi pa kulanda pa kuti abo tulelandako bomfwe. Na lyo line tufwile ukulanda mu mucinshi, tatufwile ukubilikisha ica kuti na bantu bambi bamona ukuti pali cimo icilecitika.—Mat. 12:19.
4 Ilyo Tuleshimikila pa Ncito: Nga tulalangulukilako abatwingisha incito tatwakaleshimikila mu nshita ya ncito. Lelo nga ca kutila kwamoneka ishuko lya kushimikila ilyo tuletuusha inshita ya kasuba nelyo ilyo basuminisha ukutuusha pa ncito awe ninshi kuti twacita bwino. Abengi abo tubomba na bo kuti batemwa ukulapokelela bamagazini lyonse. Nga twashimikila uwa twingisha incito mucinshi mucinshi limbi kuti aisatusuminisha ukuya ku kulongana kwa citungu ukwa nshiku shitatu ukubako cila mwaka. Nga tuli ba cikuuku, abalangulukilako bambi, kabili aba mucinshi muli ifi twalandapo, tukalapashanya Lesa wesu uwa mutembo, Yehova.