Vidio Iilenga Umuntu Ukwiluka
“Ifyaba muli iyi vidio filalenga wailuka!”
“Yalimfikile nga nshi pa mutima!”
“Yanengele ukulaumfwa icikonko pantu nga naliyonaula!”
1 Bushe na imwe e fyo mwaumfwile ilyo fye mwatambile vidio ya kuti Young People Ask—How Can I Make Real Friends? Imyaka fye inono iyapitapo, munyinefwe umulumendo alikwete ubwafya, na bamuletelele banankwe akwete. Abanankwe balengele afumya amano mu kupepa na mu kwampana na Yehova. Tapakokwele vidio ya kuti Real Friends yalifumine. Alembele ukuti: “Lyonse ilyo natendeka ukutamba iyi vidio, nalelukusha ifilamba. Nalitashishe Yehova pali vidio apekenye umwaba ifyebo nalekabila pali iyi nshita.” Vidio yalengele ayalula ubumi bwakwe no kukwata ifibusa fisuma. Na kabili atila: “Lyonse muleshiba bwino ificitikila abaice.” Mwe bafyashi na bana, mukwai pekanyeni na kabili ukuti mukatambile pamo vidio pe sambililo lyenu ilya lupwa. Ilyo mukalatamba, iciputulwa cimo nga capwa mukaleimika vidio kabili mu bufumacumi mukalelanshanya pamo amepusho yali mu maparagrafu yakonkapo.
2 Intendekelo: Bushe kuti twaishiba shani cibusa wa cine?—Amapi. 18:24.
3 Ifilenga Twafilwa Ukukwata Ifibusa: Bushe finshi mwingacita nga mulefwaya ukukwata ifibusa? (Fil. 2:4) Mulandu nshi mulingile ukuba ne mibele isuma, kabili ni bani bengamwafwa ukucite fyo? Cinshi cingalenga mwakwata abanenu abengi, kabili ni kwi mwingabasanga?—2 Kor. 6:13.
4 Bucibusa na Lesa: Finshi mwingacita pa kukosha bucibusa na Yehova, kabili mulandu nshi ukucite fyo kwacindamina? (Amalu. 34:8) Bushe abengamwafwa sana ukukosha bucibusa na Lesa ni bani?
5 Ifibusa Fyabipa: Bushe ifibusa fyabipa ni bani? (1 Kor. 15:33) Bushe ukwampana na bantu babipa kuti kwaonaula shani Umwina Kristu? Bushe finshi tusambilila ku lyashi lya mu Baibolo ilya kwa Dina?—Ukute. 34:1, 2, 7, 19.
6 Icilangililo ca Muno Nshiku: Cinshi cacitikile Tara ilyo ali uwatalalilwa? Bushe ena alemona shani ukwangala na banankwe abashipepa? Bushe ni mu bwafya bwa musango nshi bamubikile? Mulandu nshi abafyashi bakwe bashaishibile ubwafya alimo, lelo bacitile shani pa kuti beshibe ubwafya akwete pa kuti bamwafwe ukutwalilila ukupepa Lesa? Cinshi nkashi umo painiya acitile ukulangilila ukuti ali cibusa wa cine cine uwa kwa Tara? Mulandu nshi Abena Kristu balingile ukulaumfwila ifyo Amapinda 13:20 na Yeremia 17:9 yalanda? Cinshi icikalamba ico Tara asambilile?
7 Ukusondwelela: Finshi mwasambilila muli iyi vidio? Bushe kuti mwaibomfya shani ku kwafwa bambi?—Amalu. 71:17.