Pashanyeni Kasambilisha Mukalamba Ilyo Mulebomfya Icitabo ca Baibolo Isambilisha
1. Bushe Yesu alesambilisha shani?
1 Yesu Kasambilisha Mukalamba, lyonse alelondolola ifintu mu nshila yayanguka kabili iyaumfwika. Pa kuti afwe abo alelanda na bo ukutontonkanya, inshita shimo aletala abepusha icipusho. (Mat. 17:24-27) Alekomaila sana pa Cebo ca kwa Lesa. (Mat. 26:31; Marko 7:6) Talefunda abasambi bakwe ifintu ifingi pa nshita imo, pantu alishibe ukutila bakatwalilila ukulasambilila. (Yoh. 16:12) Na kabili Yesu alefwaya ukwishiba abasambi bakwe nga nabasumina no kumfwa ifyo alebasambilisha. (Mat. 13:51) Icitabo ca Baibolo Isambilisha bacilemba mu nshila ya kuti ciletwafwa ukusambilisha nga filya Yesu alesambilisha.
2. Kuti twabomfya shani amepusho yaba pa ntendekelo mu cipandwa cimo na cimo?
2 Amepusho Yaba pa Ntendekelo: Ilyo mwatendeka ukusambilila icipandwa, caliba bwino ukulanda pa mepusho yaba pa ntendekelo, pe samba lya mutwe. Ipusheni ayo mepusho, lelo umusambi eyasuka. Umulandu cawamina ukucitile ci, kulenga umusambi afwaisha ukusambilila. Nelyo kuti mwamweba alandapo mu kwipifya pa mepusho. Tatulingile ukulandapo sana pa fyo ayasuka nelyo ukulungika conse ico ashaswike bwino. Nalimo kuti mwamutasha fye pa fyo aletontonkanya kabili tendekeni ukusambilila. Nga mwaumfwa ifyo alanda pa mepusho yali pa ntendekelo, mukeshiba icishinka mukakabila ukubikako sana amano mwi sambililo.
3. Bushe kuti twalenga shani isambililo ukukanakosa?
3 Amalembo: Isambililo lilingile ukukomaila sana pa Malembo. (Heb. 4:12) Lelo, te malembo yonse ayashambwilwe ayo mwingabelenga. Komaileni pa Malembo ayalelanda pa fyo twasumina. Amalembo ayalelondolola ifyo cali nalimo te kuti muyabelenge. Icitabo ca Baibolo Isambilisha cilalondolola icine mu nshila iyayanguka. Isambililo talilingile ukukosa. Komaileni pa fishinka fikalamba, kabili mwilalanda sana pa tuntu tumo utushilekabilwa nelyo ukubikamo ifyebo fimbi ifishili mwi sambililo na pashilingile.
4. Cinshi cingalenga twapaatulako inshita ilyo tulesambilila ukulanshanya ifyebo na fimbi ifikumine isambililo?
4 Ifyebo na Fimbi: Mu mutande utila “Ifyebo na Fimbi” mwaba imitwe 14 iyafwilisha icipandwa ico mulesambilila. Ni mwe mulingile ukusala nga mulefwaya ukusambilila no musambi ifi fyebo nangu iyo. Imitwe imo imo iyaba mu mutande utila “Ifyebo na fimbi,” nalimo kuti mwakoselesha fye umusambi wenu ukuibelengela ifyebo umwine, maka maka nga naumfwa no kusumina ifyebo fili mu cipandwa. Ku ca kumwenako, umusambi nga alishiba kale ukutila Yesu e Mesia, ninshi te kuti mulanshanye nankwe umutwe utila “Yesu Kristu E Mesia Batile Akesa” ilyo mulesambilila icipandwa 4 icitila, “Yesu Kristu Nani?” Inshita shimbi, kuti caba bwino ukupatulako inshita mwi sambililo mwine ukulanshanya ifyebo na fimbi nelyo ulubali lwa ifyo fyebo.
5. Nga ca kuti tulefwaya ukulanshanya pa mutwe umo mu mutande utila “Ifyebo na fimbi,” kuti twacita shani?
5 Nga ca kuti mwasala ukulanshanya umutwe umo pali ilya ili mu mutande wa kuti “Ifyebo na Fimbi,” kuti mwapekanishisha limo amepusho no kusambilila no musambi amaparagrafu nga filya fine mwingasambilila mu cipandwa. Nangu limbi ukulingana ne fyo umusambi wenu alekabila, kuti mwapaatulako amaminiti yanono ilyo mulesambilila ukupituluka mu fyebo nankwe. Ukucite ci kukamwafwa ukwishiba nga ca kutila naumfwikisha ifyebo abelengele umwine.
6. Bushe kuti twabomfya shani umukululo wa kupitulukamo pa mpela ye sambililo limo na limo?
6 Umukululo wa Kupitulukamo: Mu mukululo uba pa mpela ya cipandwa cimo na cimo ilingi line muba amashiwi ayasuka amepusho yaba pa ntendekelo. Kuti mwabomfya aya mashiwi ku kupituluka mu fishinka fikalamba ifili mu cipandwa. Bakasabankanya bamo basanga ukuti cilaba bwino ukubelenga no musambi aya mashiwi e lyo nalimo no kubelenga amalembo yalipo. Lyena balepusha umusambi ukulondolola mu kwipifya ifyo amalembo yaleumfwana na yo mashiwi. Ici cilafwa kafundisha ukwishiba nga ca kutila umusambi naumfwa bwino bwino ifishinka fikalamba ifili mwi sambililo e lyo ne fyo fileumfwana na Baibolo. Na kabili, cilafwa kasambilisha ukwishiba nga ca kutila umusambi nasumina ifyo fine fishinka asambilila. Na kabili ici cilafwa umusambi ukwishiba ifya kubomfya Baibolo ilyo alelondolwela bambi icine.
7. Bushe kuti twabomfya shani icitabo ca Baibolo Isambilisha ilyo tulebomba umulimo wesu?
7 Inshila isuma nga nshi iingatwafwa ukubomba umulimo wesu uwa kusambilisha abantu no kupanga abasambi kupashanya inshila Yesu alefundilamo. (Mat. 28:19, 20) Icitabo ca Baibolo Isambilisha kuti catwafwa ukucite fyo. Cibomfyeni bwino ukusambilisha bambi icine mu nshila yaumfwika, iyayanguka, kabili iisuma.