Mulebomfya Bwino Ifyaba mu Citabo ca Ico Baibolo Isambilisha

Ilyo umusambi asambilila ifyo Baibolo isambilisha kabili atendeka no kulakonka ifyo alesambilila, akalakula mu fya kwa Lesa no kulatwala ifisabo fya ku mupashi. (Amalu. 1:1-3) Kuti twayafwa umusambi ukulunduluka nga tulebomfya bwino fimo fimo ifyaba mu citabo ca Ico Baibolo Isambilisha.

Amepusho Ayaba pa Kutendeka kwa Cila Cipandwa: Cila cipandwa citendeka na amepusho ayasukwa muli ico cine cipandwa. Kuti mwaipusha ifi fipusho pa kuti mulenge umusambi alefwaisha ukwishiba ifyo alasambilila. Nelyo kuti mwamweba ukulandapo panono pa cipusho cimo na cimo. Nga ca kuti ifyo ayasuka tafilungeme, tamufwile ukumulungika apo pene. Ifyo ayasuka kuti fyamwafwa ukwishiba ifishinka mulingile ukwangwako no kukomailapo sana.—Amapi. 16:23; 18:13.

Ifyebo na Fimbi: Nga ca kuti umusambi aumfwikisha kabili asumina ifyo mwacilasambilila, kuti mwamukoselesha ukuibelengela ifyebo na fimbi ifilelanda pa fyo mwacilasambililapo. Pe sambililo likakonkapo, kuti mwabomfyako amamineti ayanono ukulanshanyapo pa kutila mwaumfwa nga ca kuti aliumfwikisha ifyo abelengele. Nalyo line, nga mwamona ukuti nacilinga, lilya line mulesambilila kuti mwalanshanya nankwe ifyebo na fimbi. Kuti mwabelengako amaparagrafu e lyo no kumwipusha ifipusho ifyo mwacipekanishisha libeela.

Akabokoshi ka Ifyo Baibolo Isambilisha: Akabokoshi ka ifyo Baibolo isambilisha akaba pa mpela ya cila cipandwa muba ifyasuko ku fipusho fiba pa ntendekelo ya ico cipandwa. Kuti mwabomfya ifi fyebo nga mulefwaya ukumona umusambi nga naumfwikisha kabili nga kuti alondolola ifishinka ificindeme mwi sambililo. Lanshanyeni ifi fyebo kabili belengeni no musambi amalembo ayalipo. Lyena kuti mwaeba umusambi abomfye ilembo nelyo amalembo ukulondolola umulandu ifyo ifyebo fibelele ifya cine.—Imil. 17:2, 3.