“Mwe Bacaice—Finshi Mukacita mu Bumi Bwenu?”

¹ Umukashana umo atile: “Ndefwaya nkabe ne nsansa mu bumi bwandi.” Tatuletwishika ukuti na iwe e fyo ufwaya. Lelo kuti waba shani ne ‘nsansa’ mu bumi bobe? Pa mulabasa, pa TV, amanyunshipepala, na banobe, nalimo no kubikapo fye na bakafundisha bobe, limbi kuti bakweba ukuti pa kuti ukekale bwino sana ku ntanshi kano wakwata incito isuma ne ndalama ishingi!

² Lelo, Baibolo yasoka abacaice ukuti ukufwaya sana ifyuma kwaba kwati ‘kuumo mwela.’ (Luk. Mil. 4:4) Ico ushifwile ukulaba ca kuti banono sana abacaice abesa mu kuba abakankaala no kulumbuka. Abo abesa mu kukwata ifyo fyuma ilingi line tababa ne nsansa isho baletontonkanya ukuti e sho bakakwata. Umupungwe umo umwina Britain uwaile ku masambililo ya pa mulu atila: “Ukukwata ifyuma kwaba kwati cibokoshi umushili ifintu. Ilyo wafwaya ukuti umone ifilimo, wasanga fye tamuli nangu cimo.” Ca cine, incito inshita shimo kuti yalenga wakwata ifyuma no kwishibikwa sana ku bantu. Lelo te kuti tufishepo ‘ifyo tukabila ku mupashi’ nga tuli ne ncito iisuma. (Mat. 5:3) Na kuba, 1 Yohane 2:17 itusoka ukuti, “icalo cileya.” Nangu ukakwate shani ifyuma muli cino calo, tawakekalilile na fyo ku ciyayaya.

³ Ifyo Wingacita pa Kuba Inte ya kwa Yehova: Ica kubalilapo fye ico wingacita, ulingile ukufwaya ukubombela Lesa ukufuma ku mutima. Kabili uko kufwaya takuishila fye, nangu ca kuti abafyashi bobe Bena Kristu. Ulingile ukukwata bucibusa bwa pa lobe na Yehova. Umukashana umo atila: “Ukupepa kulafwa ukukwata bucibusa bwa pa lobe na Yehova.”

⁴ Pa Abena Roma 12:2 palanda pa calenga bubili ico ulingile ukucita. Patila: “Mushininkishe mwe bene icabo kufwaya kwa kwa Lesa icisuma kabili icapokelelwa kabili icapwililika.” Bushe walitala autwishikapo ifyo bakusambilisha? Lyena umfwila ifyo Baibolo ikonkomesha, kabili ‘ishininkishe we mwine’ ukuti ifi fintu fya cine! Ifwaile ifyebo we mwine. Belenga Baibolo ne mpapulo shilanda pali Baibolo. Ukusambilila pali Lesa te kubelenga fye walabako no kulabako iyo. Shako ne nshita ya kwetetula pali ifyo wabelenga pa kuti fyafika pa nshi ya mutima obe uwa mampalanya. Ici cikalenga ukutemwa watemwa Lesa ukukula.—Amalu. 1:2, 3.

⁵ Icakonkapo, ilyo ulelanda fye ilyashi na bantu bambi, uleesha ukubebako ne fyo wasambilila, ukusanshako na balya usambilila nabo. Lyena kuti watendeka ukushimikila ku ng’anda ne ng’anda. Ilyo uleshimikila, inshita shimo kuti wakumanya abo usambilila nabo, kabili nalimo kuti waumfwa insoni. Lelo Baibolo ikonkomesha ukuti tatulingile ukuba ne “nsoni ku mbila nsuma.” (Rom. 1:16) Ubukombe ulesabankanya bukombe bupeela ubumi ne subilo! Mulandu nshi ufwile ukubela ne nsoni?

⁶ Nomba, abafyashi bobe nga Bena Kristu, nalimo walitendeka kale ukubomba nabo muli uyu mulimo wa kushimikila. Bushe wiminina fye pa mwinshi ulekutikako fye uko abafyashi bobe balelanda nangu bushe ushalika fye bamagazini na matrakiti? Bushe kuti walanda no mwine wa ng’anda pa lobe, ukubomfya Baibolo ukumusambilisha Icebo ca kwa Lesa? Nga ca kuti te kuti ushimikile pa lobe, kuti waipusha abafyashi bobe nelyo kasabankanya umbi uwakosoka mu cilonganino ukukwafwa. Lyonse imika ubuyo bwa kufikapo ubwa kuba kasabankanya uushabatishiwa uwa mbila nsuma!

⁷ Lilya wabatishiwa, e lyo uba Inte ya kwa Yehova. (Esa. 43:10) Ukwishiba fye ukuti uli Nte ya kwa Yehova kuti kwalenga wabomfya bwino ubumi bobe. Ukuipeela kusanshamo ‘ukuikaana we mwine.’ (Mat. 16:24) Kuti nalimo wasalapo ‘ukufwaya intanshi ubufumu bwa kwa Lesa’ no kuleka ukukonkelela amabuyo ya pa lobe. (Mat. 6:33) Natulandepo pa mabuyo yamo.

⁸ Ukubomba Umulimo wa Nshita Yonse: Bupainiya lishuko lya kubombako umulimo wa nshita yonse. Painiya ni kasabankanya uwa mibele isuma uwapekanya ukulabombako amaawala 70 cila mweshi mu mulimo wa kubila imbila nsuma. Nga mulepoosa inshita ikalamba mu mulimo wa kushimikila no kusambilisha kuti mwaishiba bwino ukusambilisha. Bapainiya abengi balimona ubusuma bwaba mu kwafwa umusambi wa Baibolo ukuba Inte yabatishiwa. Bushe kwaba incito iyingalingana na bupainiya ubusuma?

⁹ Isukulu lya Kukansha Ilya Butumikishi lyapangilwe ukukansha baeluda na babomfi batumikila abashimbe. Mu masambililo bakwata ayengi nga nshi, mu milungu fye 8, basambililamo imilimo ya baeluda na babomfi batumikila, ifyo ukuteyanya kwaba, e lyo ne fya kulanda amalyashi pa cintubwingi. Bamo babatuma mu calo cabo mwine. Bambi balabatuma ukuya mu kubombela ku fyalo fimbi.

¹⁰ Ababombela pa Bethel bantu baitemenwa ukubomba pa maofesi ya Nte sha kwa Yehova. Bamo ababomba pa Bethel babomba mu kulungatika umulimo wa kulemba impapulo shilanda pali Baibolo. Bambi batungilila ababomfi babombela ku kupanga impapulo, na aba abatungilila iyi milimo basakamana ifikuulwa ne fibombelo nangu ifyo ulupwa lwa Bethel lukabila pa kutwalilila umulimo wabo. Imilimo yonse iya pa Bethel, milimo ya mushilo iya kwa Yehova. Kabili, aba pa Bethel balasansamuka pa kwishiba ukuti incito fye yonse iyo babomba, ilafwilisha aba bwananyina abengi nga nshi icalo fye conse.

¹¹ Ukubombela Yehova no Mweo Onse: Ukubombela Yehova e mikalile isuma. Kuti cawama nga mwapanga ukulabombela Yehova mu mulimo wa nshita yonse, bushe te ifyo? Lanshanyeni na bafyashi benu pa mulimo wa nshita yonse, lanshanyeni na baeluda pa cilonganino, e lyo na kangalila wa muputule. Nga mulefwaya ukubombako pa Bethel, nangu ukuya ku Sukulu lya Kukansha Ilya Butumikishi, kuti mwasangwa ku kukumana kubako pa kulongana kwa muputule na pa kulongana kwa citungu.

¹² Kwena te bonse abengabombako umulimo wa nshita yonse. Limo limo ukulwalilila, ubwafya bwa ndalama, e lyo ne milimo ya lupwa kuti yalenga twafilwa ukucita fyonse ifyo tufwaya ukubomba. Nomba nangu ni fyo, Abena Kristu bonse abaipeela bafwile ukumfwila ifunde lya mu Baibolo ilya kuti: “Uletemwa Yehova Lesa obe no mutima obe onse, no mweo obe onse, no kutontonkanya kobe konse.” (Mat. 22:37) Yehova afwaya ukuti mulebomba umulimo wakwe apapela amaka yenu. E ico nangu ifintu fibe mu musango nshi, cindamikeni ukubombela Yehova ukucila imilimo yonse. Pangeni ukucita ifyo mwingakumanisha ukubomba. ‘Ibukisheni Kalenga wenu mu nshiku sha bulumendo bwenu,’ nga mwacite fyo mukapaalwa umuyayaya!