Ukulongana Kwaibela Ukupya

Nga twaumfwa ukusoka lelo tatucitilepo nangu cimo, ifingatumbukamo kuti fyabipa nga nshi. Nacicilanapo kucindama ukuumfwila ubutungulushi bwa ku mupashi ubufuma kuli Yehova. Ici cikakomailwapo mu malyashi ya pa kulongana kwaibela ukwa mwaka wa mulimo uuleisa. Umutwe ukalati “Cenjeleni ku fyo Muumfwa.”—Luka 8:18.

Ilyashi lya kwa kalanda umutandashi ilya kubalilapo likalanda pa fyo ukufunda kwa mu fipandwa fya kwiswila ifya muli kalata wa kwa Paulo ku baHebere fibomba kuli ifwe muno. Mu lyashi lya kusondwelela ilikalati, “Angweni Sana ku Kusambilisha kwa Bulesa,” kalanda akatwafwa ukumona nga cine cine tulekutika kuli Yehova, ku Mwana wakwe, na ku “musha wa cishinka kabili uwashilimuka.”—Mat. 24:45.

Amalyashi ayengi yakaba aya kunonsha nga nshi sana sana ku ndupwa. Ilyashi lya kuti “Indupwa Ishikutika ku Cebo ca kwa Lesa Ukwabulo Kupumfyanishiwa” likatwafwa ukukanaleka ifya ku calo ukunasha bumupashi bwesu. Mukaba ukwipusha abayalula ifintu pa kuti batangisheko ifya ku mupashi. Mu lyashi lya mutwe wa kuti “Ifyo Ukukutikisha ku Cebo ca kwa Lesa Kukosha Imisepela Yesu” mukaba ukwipusha imisepela ya bucishinka ku cine pa sukulu, ku banabo, nelyo mu mulimo wa kubila. Ilyashi lya kuti “Abana Banono Abakutika no Kusambilila Kuli Lesa” likatwafwa ukukanasuula amaka ya kusambilila aya bacaice. Ukwipusha bacaice na bafyashi babo kukatwafwa ukumona ubunonshi bufuma mu kukansha abana ukutula ku bunya ukukonka inshila sha kwa Yehova.

Ilyo Satana ‘alelufya aba pano isonde bonse,’ Yehova wena alelanga ababomfi bakwe aba cishinka inshila iyo bafwile ukwendamo. (Ukus. 12:9; Esa. 30:21) Ukukutikisha ku kufunda kwa kwa Yehova no kukuumfwila mu mikalile yesu kutulenga ukuba na mano, kulatuletela insansa, kabili kulatutungulula ku mweo wa muyayaya.—Amapi. 8:32-35.