Ukulongana Kwaibela Ukwa Bushiku Bumo Ukupya

Ilinso lyapangwa mu musango wa kupapa. (Amalu. 139:14) Na lyo line, kuti lyatonta fye pa cintu cimo cila nshita. Ico kuti cacitika ku menso ya cine cine, na ku menso ya ku mupashi. Pa kuti amenso yesu aya ku mupashi yalemona bwino, tulingile ukubika amano ku kucita ukufwaya kwa kwa Lesa. Apo ifya kutupumbula mu calo ca kwa Satana fileya filefulilako fye, nacilinga ukuti ukulongana kwaibela ukwa mu mwaka wa mulimo uwa 2006 kukalande pa mutwe uleti “Sungeni Ilinso Lyenu Ilituntulu!”—Mat. 6: 22.

Kuti twacita shani pa kuti na ifwe Yehova akatupaale? (Amapi. 10:22) Ilyo lipusho likasukwa mu lyashi lya kuti, “Ipakisheni Amapaalo Yaba Mu Kusunga Ilinso Lyenu Ilituntulu.” Ukwipusha no kulanshanya kukakomaila pa fyo twingamwenamo mu kubomfye fishinte fya mu Malembo. Ilyashi lya kubalilapo ilyo kalanda umutandashi akalanda likaba lya kuti, “Ukusunga Ilinso Lyesu Ilituntulu Muli Cino Calo Cabipa.” Likalanda pa fintu ifingalenga imikalile yesu ukwafya kabili ifingonaula bukapepa bwesu. Tukasambilila na pa fyo umuntu engacita pa kusala “icintu cisuma.”—Luka 10:42.

Ni shani abafyashi na bambi bengakoselesha Abena Kristu bacaice ukubika amano ku fya ku mupashi? Mu lyashi likalatila “Abafyashi Abalungika Bwino Imifwi Yabo,” ne lya kuti, “Imisepela Abatinamina Ifya Ku Mupashi,” mukaba no kwipusha abafyashi ne misepela abakalanda pali ili lipusho lyacindama. (Amalu. 127:4) Ilyashi lya kulekelesha ilya kwa kalanda umutandashi likalanda pa fyo twingendela pamo no kuteyanya kwa kwa Yehova ngo muntu umo umo, ngo lupwa, e lyo ne fyo twingacite co nge cilonganino.

Te mulandu twalibombela Yehova pa myaka iingi nangu e lyo twishibe fye icine, calicindama ukusunge ‘ilinso lyesu ilituntulu.’ Ukulongana kwaibela ukwa bushiku bumo kukatwafwa ukucite fyo.