Tulatasha pa fyo Lesa Atupaala!
1 Ukutula fye apo umuntunse abelapo pano calo, Yehova alipaala ababomfi bakwe mu nshila shalekanalekana. Alipaala bonse abaume na banakashi te mulandu no mushinku nelyo icifulo bakwata. (Luka 1:41, 42; Imil. 7:46; Fil. 1:29) Nga pali ino nshita, atupaala shani?
2 Ifyo Lesa Atupaala: Twalipaalwa pantu Yehova e utusambilisha. (Mat. 13:11, 15) Ishuko limbi ilyo twakwata lya kulandapo ilyo tuli pa kulongana. (Amalu. 35:18) Nga twakwata ishuko lya kulandapo, tulalandapo no mweo onse. Cimo cine na ku milimo imbi iya mu cilonganino, nga tulemona ukuti Lesa alitucindika pa kutupeela iyi milimo, tukalabomba iyi milimo no mutima wesu onse. Bushe tulabombako lyonse umulimo wa kuwamya Ing’anda ya Bufumu no kuisunga bwino?
3 Nangu ca kutila abantu abengi balatwishika nampo nga Lesa alasuka amapepo yabo nelyo iyo, ifwe twalipaalwa mu nshila yaibela pantu nangu ca kutila Lesa e Mukalamba mu bubumbo bonse alasuka amapepo yesu. (Amapi. 15:29) Yehova umwine e ukutika ku mapepo ya babomfi bakwe. (1 Pet. 3:12) Tabika imiku twingapepa kuli ena, kuti twapepa imiku ili yonse iyo tulefwaya. Ala mwandini ipepo bupe ubusuma ubo twakwata, pantu kuti twapepa “inshita shonse”!—Efes. 6:18.
4 “Bakabomba Banankwe aba kwa Lesa”: Umulimo uusuma uo twakwata wa kubila imbila nsuma ya Bufumu ubwa kwa Lesa pamo nga “bakabomba banankwe aba kwa Lesa.” (1 Kor. 3:9) Uyu mulimo ulalenga twaba ne nsansa kabili ulatupembesula. (Yoh. 4:34) Yehova te bantu fye engabomfya ukushimikila imbila nsuma, lelo ico atupeelela uyu mulimo ni co alitutemwa. (Luka 19:39, 40) Yehova tapeela fye uyu mulimo ku uuli onse. Ababomba uyu mulimo wa kushimikila balingile ukufika pa fyo Lesa afwaya no kulaficita. (Esa. 52:11) Bushe tulalanga ukuti twalibikako amano kuli uyu mulimo pa kubombako cila mulungu?
5 Amapaalo Lesa atupeela yalatucindamika. (Amapi. 10:22) Twilayacefya iyo! Nga tulecita ifilanga ukuti twalibikako amano ku fyo Lesa atupaala, tulatemuna Shifwe wa mu muulu uutupeela “conse icisuma ne ca kupeelwa conse icapwililika.”—Yako. 1:17.