Ukupepa Yehova Pamo no Lupwa
1 Pa nshita Baibolo yalelembwa, aba mu lupwa balebombela pamo. Balebombela pamo imilimo ya pa ng’anda, ne cikalamba sana ico balecita kupepela pamo. (Lebi 10:12-14; Amala. 31:12) Ino nshita, mu ncende ishingi banono sana abacitila ifintu pamo no lupwa. Lelo Abena Kristu bena balishiba ubusuma bwaba mu kubombela pamo no lupwa, maka maka ukupepa Lesa. Lesa uwatendeke ulupwa afwile alomfwa bwino ukumona uko indupwa shikatana mu kumupepa!
2 Muleshimikila Pamo: Nga muleshimikila pamo imbila nsuma, ulupwa lulekatana. E ico, eluda alabomba na bambi mu mulimo wa mwi bala mu cilonganino, e lyo no kubomba lyonse no mwina mwakwe na bana. (1 Tim. 3:4, 5) Nangu ca kuti bakangalila benda balikwata ifya kucita ifingi, nabo bene balatantika inshita ya kubomba na bena mwabo mu mulimo wa kubila mbila nsuma.
3 Abafyashi ababomba na bana babo mwi bala balabafwa ukulashimikila bwino. Abana bakamona ifyo abafyashi babo batemwa umulimo wa kushimikila ne nsansa basangamo. Na kabili bakamona ifyo abafyashi babo batemwa Yehova na bantu banabo. (Amala. 6:5-7) Ilyo abana baleya balekuula, abafyashi balakonkanyapo ukulashimikila nabo. Abafyashi bamo abakwata abana baume batatu ababa ne myaka 15 ukufika ku 21 bacili balabomba na bana lyonse mu mulimo wa mwi bala. Bawishi batile: “Tulabafunda ifipya cila bushiku. Kabili ifyo tubasambilisha tufwaya fyaba ifisuma nga nshi kabili ifya kubakoselesha.”
4 Pekanishisheni Pamo: Aba mu lupwa balisanga ukuti cilaba bwino ukupekanishisha umulimo wa mwi bala pamo. Abana balatemwa nga mulepituluka mu fyo mukalanda pa kushimikila. Lilya mulepitulukamo kuti muleyalula, limbi umwana kuti aba kasabankanya e lyo imwe mwaba umwine wa ng’anda. Bamo nga bapwisha isambililo lya lupwa e lyo bapitulukamo mu fyo bakalanda pa kushimikila.
5 Ifwe pamo na bo twatemwa, tulaba ne nsansa nga tulebombela pamo imilimo yacindama. Ala mwandini cilawama nga ca kuti ababa mu lupwa balebombela pamo mu mulimo wa ku ng’anda ne ng’anda e lyo na ku fipempu fya kubwelelamo no kuya mu kutungulula amasambililo ya Baibolo! Ilyo mulepepa Yehova pamo no lupwa lwenu, kuti mwaba ne nsansa pa kulanda aya mashiwi ya kuti: “Lelo ine na ba mu ng’anda yandi, tulebombela Yehova.”—Yosh. 24:15.