Programu Iipya Iya Kulongana Kwaibela Ukwa Bushiku Bumo

Umutwe wa kulongana kwaibela ukwa bushiku bumo ukwa mwaka wa mulimo uwa 2008 uleti “Ifwe Tuli Ibumba—Yehova E Mubumfi Wesu,” ufumine pali Esaya 64:8. Ukufunda kwa mu Malembo ukukaba pali uku kulongana kuli no kutwafwa ukumfwikisha no kucindamika amano ya kwa Yehova, umulinganya akwata, amaka yakwe, e lyo no kutemwa pantu e Kabumba Mukalamba.

Ilyashi lya kwa kangalila wa muputule ilikalati “Ukulabomba Umulimo Nge Fipe fya Mucinshi,” lili no kutulangilila ifyo abantu abengi baleipakisha amapaalo pa mulandu wa kwishiba icine no kulashimikilako bambi ico cine. Ilyashi ilileti “Mukacingililwa nga Muletontonkanya Sana” lili no kutwafwa ifyo twingacingililwa nga tuletontonkanya sana pa mafunde yalungama aya kwa Yehova. Kalanda umweni ali no kulanda na ifwe pa mutwe wa kuti “Tatwapalana no Bwikashi Buno” e lyo no mutwe wa kuti “Lekeni Kabumba Mukalamba Alemukansha.” Abafyashi pamo pene na bana bakakoseleshiwa nga nshi ku malyashi yakalati “Abaice Abakwata Incito Kuli Yehova” e lyo ne lyashi lya kuti “Umulimo Wacindama Uo Abafyashi Babomba mu Kukansha.” Kukaba ifilangililo e lyo no kwipushako bamo bamo, kanshi tukatemwa ukumfwa no kumona ifyo bamunyinefwe abaume na banakashi balebomba mu mulimo wabo. Abalefwaya ukulangilila ukuipeela kwabo kuli Lesa mu lubatisho lwa mu menshi kuti baeba kangalila wa kutangilila bwangu bwangu. Mwikalaba ukusenda Ulupungu lwa kwa Kalinda ulo tukalasambilila muli uyo mulungu wa kulongana kwaibela.

Conse ico Kabumba Mukalamba afwaya ukucita alacita. Nomba ciba fye ku muntu umwine ukucitapo cimo pa fyo Kabumba alemukansha. Bonse abomfwila amafunde ya kwa Yehova, kuti bamumungwa no kukanshiwa nga filya nakabumba abumba ifipe, kabili kuti baba ababomfi bakwe abasuma nga nshi. Nga tuleumfwila Yehova, kuti twasansabika ubufumu bwakwe no kutupaala kuti atupaala.