Tulebako Bambi Isubilo Lyesu Ilya Bufumu
1 Muli shino nshiku sha kulekelesha ishayafya, abantu abengi baba mu bushiku tabaishiba ifyo cikaba ku ntanshi. (Efes. 2:12) Bamo babika amano ku fyuma, bacetekela na bakateka, sayansi, na fimbipo; bena bamona kwati e kuwamya kanshi nakalya. Lelo ifwe twalishuka nga nshi pa kukwata isubilo line line, ilyaba “nge nanga ya mweo, ilyashininkishiwa kabili ilyakosa”!—Heb. 6:19.
2 Mu Bufumu bwa kwa Lesa, icalo cikaaluka cikaba paradaise. Abantu besu abafwa bakabuuka. (Imil. 24:15) Ubupiina, ulufyengo, ukulwala, ubukote, ne mfwa fikapwa. (Amalu. 9:18; Mat. 12:20, 21; Ukus. 21:3, 4) Ifi e fimo fimo ifyo Yehova atulaya ifili no kufikilishiwa nomba line. Bushe imwe finshi mufwaya sana ukuti fikacitike?
3 Bileni Imbila Nsuma: Tatufwile ukwikala tondolo ukwabula ukwebako abantu imbila nsuma. Ukutemwa twatemwa Lesa na banensu kulalenga tulepashanya Yesu no ‘kulabila imbila nsuma ku bapiina, . . . no kubila ukuti abafungwa bakalubulwa no kushibula amenso ya mpofu, no kulubula abanyanyantilwa.’ (Luka 4:18) Umutumwa Paulo alebila imbila nsuma mu maliketi na konse ukwaleba abantu. Alibikile sana amano ku mulimo wa kubila imbila nsuma. (Imil. 18:5) Nga tulemupashanya ifyo aali uwacincila ukubila imbila nsuma kuti twaicingilila ku “masakamika ya muli cino calo no kubeleleka kwa fyuma” ifingalenga isubilo lyesu ukushibantukila.—Marko 4:19.
4 Nga twasanga abantu abashibika amano ku mbila nsuma, nangu nga twasanga abatulwisha, na lyo line tulatwalilila ukuba fye ne subilo lya Bufumu ilyakosa. Ifwe, tutwalilila fye ‘ukwikatisha ukulumbula icitetekelo cesu no kukanaungwaungwa.’ (Heb. 10:23) Tatwaba na ‘nsoni ku mbila nsuma.’ (Rom. 1:16) Abantu nga balemona fye ukuti twalishinkisha no kubikapo fye ukulabila imbila nsuma, umuye nshiku na bo kuti baumfwa.
5 Nangu ca kutila kwena tufwile ukulanda na pa fyo ifintu fibipile mu calo ukulingana ne fyo ubusesemo bwa mu Baibolo bwalanda, tatuli bakabikula ba mbila sha bulanda. Lelo umulimo wesu uwa kushimikila wa kulanda fye pe subilo lya Bufumu, tubila ilyashi lisuma ilya Bufumu bwa kwa Lesa. Shi lekeni tube abakosa kabili abacincila ilyo tulebila iyi mbila nsuma pa kuti ‘twisulemo ukucetekela ukufika na ku mpela.’—Heb. 6:11.