Umukululo Wa Mepusho

◼ Bushe abafyashi bonse babili bafwile ukupenda inshita pe sambililo lya lupwa?

Nangu ca kutila abafyashi abaume e bapeelwa umulimo wa kukusha abana mu “kusalapula no kukonkomesha kwa kwa Yehova,” abafyashi bonse babili balikwata umulimo wa kusambilisha abana. (Efes. 6:4) Baibolo ikoselesha abana ukuti: “We mwana wandi umwaume, umfwo kusalapula kwa kwa wiso, kabili wileka malango ya kwa noko.” (Amapi. 1:8) Inshila imo iyacindama iyo abafyashi basambilishishamo abana kupitila mwi sambililo lya Baibolo ilya lupwa.

Kale, umufyashi uuletungulula isambililo lya lupwa ku bana abashabatishiwa e walependa fye inshita, nangu ca kutila bonse babili balesambilishako abana. Lelo kuli ukwaluka. Nga ca kutila ilyo bali pe sambililo lya lupwa abafyashi bonse babili balesambilishako abana, ninshi bonse babili kuti bapenda inshita ukufika kwi awala limo pa mulungu umo. Kwena, ilingi line inshita abafyashi bapoosa cila mulungu ukusambilisha abana ilacila pe awala limo. Ukusambilisha abana mulimo uukalamba ku bafyashi bonse babili. (Amala. 6:6-9) Lelo, lipoti ya cila mweshi ilingile ukulangilila sana ifyo mulebomba mu mulimo wa mwi bala. E ico, inshita mufwile ukupenda cila mulungu ilyo mwasambilila na bana taifwile ukucila pe awala limo, nampo nga inshita mwapoosele pa kusambilila na bo naicila pe awala limo, nelyo namusambilila na bana benu imiku iingi mu mulungu umo, atemwa namusambilila no mwana umo umo. Cila mulungu nga mwatungulula isambililo lya Baibolo ku bana, umufyashi umo fye e ufwile ukucita lipoti isambililo lya lupwa ne cipempu ca kubwelelamo cimo.