Umukululo wa Fipusho

◼ Bushe isambililo lya Baibolo ilya lupwa lifwile ukucitwa lipoti ku cilonganino?

Nga ca kuti umufyashi Umwina Kristu aletungulula isambililo lya Baibolo ilya lupwa apali na bana abashabatishiwa, uyo mufyashi kuti acita lipoti iawala limo fye mu mulungu, icipempu ca kubwelelamo cimo mu mulungu, ne sambililo lya Baibolo ilya mu ng’anda limo pa mweshi. Ifi e fya kucita lipoti nangu ca kuti isambililo lyacila pe awala limo, nangu lyatungululwa ukucila pa muku umo mu mulungu, nelyo nga liletungululwa ku bana umo umo.—Moneni icitabo ca Abateyanishiwa, ibu. 104.

Nga ca kuti bonse aba mu ng’anda ni Nte shabatishiwa, lyene te kuti kube ukucita lipoti inshita atemwa isambililo (kano nga ca kuti umwana acili alesambilila icitabo calenga bubili pa numa ya kubatishiwa). No mulandu cingabele fyo wa kuti lipoti wa mulimo wa mwi bala uwa cilonganino alanga maka maka ifibombwa mu mulimo wa kushimikila imbila nsuma no kusambilisha icine ca mu Baibolo ku bashilati babe ababomfi baipeela kabili ababatishiwa aba kwa Yehova. (Mat. 24:14; 28:19, 20) Lelo, te kutila isambililo lya lupwa ilya lyonse talyacindama.

Mulimo wa bafyashi Abena Kristu ukusambilila na bana babo. Abalekabila ubwafwilisho mu kutendeka nelyo ukuwamyako isambililo lyabo ilya lupwa kuti baipusha baeluda ukubafwako. Nga ca kuti cilefwaikwa ukuti kasabankanya umbi aletungulula isambililo lya Baibolo ku mwana uushilabatishiwa uwa mu lupwa lwa Bwina Kristu lelo uusangwa ku kulongana, ipusheni kangalila wa kutangilila nelyo kangalila wa mulimo. Nga ca kuti isambililo lya musango yu lyasuminishiwa, uuletungulula kuti alicita lipoti filya fine tucita lipoti amasambililo ya Baibolo yambi.

Ukukansha abana mu mibele ya kwa Yehova kusanshamo inshita ikalamba nga nshi no kubombesha ukucila pa filembwa pali lipoti wa mulimo wa mwi bala. (Amala. 6:6-9; Amapi. 22:6) Abafyashi ba Bwina Kristu balingile ukutashiwa pa kubomba uyu mulimo wayafya uwa kukusha abana babo “mu kusalapula no kukonkomesha kwa kwa Yehova.”—Efes. 6:4.