Ukusambilila Baibolo pa Lwenu no Kusambilila Pamo no Lupwa Kwalicindama!
1. Cinshi Ibumba Litungulula lyabikako sana amano muno nshiku, kabili mulandu nshi?
1 Nga filya cali mu nshita ya batumwa, Ibumba Litungulula lyalibika sana amano ku kusakamana abantu ba kwa Yehova. (Imil. 15:6, 28) Ilyo ubucushi bukalamba bulepalamina, nacicindama ukuti kasabankanya wa Bufumu uuli onse abe na bucibusa bwakosa na Yehova. Bushe finshi mukalacita pa nshita ilya mwaleya ku kulongana kwe Sambililo lya Citabo? Bonse tulekoseleshiwa ukulabomfya iyi nshita ku kulapepela pamo no lupwa. Ukubomfya bwino iyi nshita kukalenga ukuti tukalesambilila sana Icebo ca kwa Lesa icapuutwamo no kunonkelamo mu fyo tulesambilila.—Amalu. 1:1-3; Rom. 11:33, 34.
2. Ni lilali tukalapepela pamo no lupwa?
2 Ubushiku bwa Mapepo ya Lupwa: Imitwe ya ndupwa ilekoseleshiwa ukushininkisha ukuti ilebomba umulimo uo Yehova aipeela uwa kusambilila lyonse Baibolo no lupwa. (Amala. 6:6, 7) Bamunyinefwe na bankashi abashimbe abashakwata imilimo ya kusakamana ulupwa na bo bene bakalabomfya iyi nshita iyo twaleya ku kulongana kwe Sambililo lya Citabo ku kusambilila Baibolo pa lwabo no kusapika. Nacicindama ukuti ifwe bonse ‘tulebomfya bwino inshita’ ku kuisambilisha fwe bene no kwetetula pa kuti tutwalilile ukuba na bucibusa bwakosa na Yehova muli shino ‘nshiku sha bubifi.’—Efes. 5:15, 16.
3, 4. Finshi mwingabomfya pa kusambilila, kabili buyo nshi mufwile ukukwata?
3 Ifya Kusambilila: Watch Tower Publications Index nelyo Watchtower Library iya pa CD-ROM kuti yamwafwa ukusanga ifyebo ifingalenga ulupwa lwenu ukuipakisha ilyo mulesambilila Baibolo. Indupwa kuti shasambilila ifipande ifiba lyonse mu Ulupungu lwa kwa Kalinda, ifipande pamo nga “Ifingalenga Indupwa Ukuba ne Nsansa,” “Fundeni Abana Benu,” na “Icipande ca Baice.” Na kabili, muli Loleni! mulaba ifipande fya kuti “Abacaice Bepusha Ukuti” ne fipande fimbi ifisuma nga nshi ifilanda pa malyashi ayalekanalekana.
4 Nga mulebelenga Baibolo pamo no lupwa mu mutekatima, bonse bakalaibukisha ifishinte fya kwa Lesa no kulafibomfya mu mikalile yabo. (Heb. 4:12) Limo kuti mwatambako na vidio iili yonse iyo ukuteyanya kwatupekanishisha no kulanshanya ifyo mwatamba. Mukalasala mwe bene ifyo mwingasambilila ne fya kucita pa kusambilila. Kuti muleipushako na ba mu ng’anda yenu ifyo bengatemwa ukusambilila, ne fya kucita pa kusambilila.
5. Mulandu nshi ukusambilila Baibolo pa lwesu no kusambilila pamo no lupwa kucindamine sana nomba?
5 Umulandu Cicindamine Nomba: Ukukosha bucibusa bwesu na Yehova kukatupangasha ‘ukwiminina ndi no kumona ifyo Yehova akatupususha.’ (Ukufu. 14:13) Abafyashi balakabila ubutungulushi bwa kwa Lesa pa kukusha abana muli ino “nkulo iyapondama kabili iyapotama.” (Fil. 2:15) Abana balakabila ukubafwa pa kuti bengacimfya imibele ileya ilebipilako fye mu masukulu muno nshiku. (Amapi. 22:3, 6) Abaupana bafwile ukukosha icikakilo cabo ‘icapyatwa ne ntambo shitatu,’ e kutila ukubika Yehova mu cupo. (Luk. Mil. 4:12) E ico kanshi, natulebomfya bwino inshita isheleko ku kuikosha pa mufula wa ‘citetekelo cesu ica mushilo’!—Yuda 20.