Ukushimikila Kulakosha Bucibusa Bwesu na Yehova
1. Umulimo wa kushimikila utuletela amapaalo nshi?
1 Ukuba abacincila mu mulimo wa kushimikila kuti kwakosha bucibusa bwesu na Yehova no kutulenga ukuba ne nsansa sana. Lelo kwena icikalamba ico tubombela umulimo wa kushimikila ca kuti tufwaya ukutemuna Yehova. Nomba nga twaumfwila amashiwi ya kuti “bila icebo,” tulapaalwa nga nshi kabili cilatuwamina na mu nshila shimbi. (2 Tim. 4:2; Esa. 48:17, 18) Ukushimikila kuti kwatukosha shani no kutulenga ukuba ne nsansa?
2. Ni mu nshila nshi umulimo wa kushimikila utukoseshamo?
2 Ukushimikila Kulatupeela Amaka na Mapuaalo: Ukushimikila kulatulenga ukulatontonkanya sana pa mapaalo ayo Ubufumu bukaleta ukucila ukulatontonkanya fye pa macushi ya pali ino nshita. (2 Kor. 4:18) Ukulondolola ifyaba mu Baibolo kulakosha icitetekelo cesu mu malayo ya kwa Yehova no kutulenga ukutemwa sana icine. (Esa. 65:13, 14) Ilyo tuleafwa bambi ukukosha bucibusa bwabo na Yehova pa kuti beba “aba muli ici calo,” na ifwe bene tulakosha ukupingulapo kwesu ukwa kukanaba aba pano calo.—Yoh. 17:14, 16; Rom. 12:2.
3. Umulimo wesu uwa kushimikila utwafwa shani ukuba ne mibele ya Bwina Kristu?
3 Ukubombako umulimo wa kushimikila kulatwafwa ukuba ne mibele ya Bwina Kristu. Ku ca kumwenako, ukwesha ‘ukuba fye nge fili abantu bonse’ kulatulenga ukuicefya nga nshi. (1 Kor. 9:19-23) Ilyo tulelanda ku bantu abo ‘bacusha kabili abapaswa nge mpaanga ishabula kacema,’ tulasuka twasambilila ukuba no luse no kulangulukilako. (Mat. 9:36) Tulasambilila ukushipikisha ilyo twatwalilila fye ukushimikila nangu ca kutila abantu balekaana nangu baletukaanya. Tulasekelela nga nshi pa fyo tuipeelesha ukwafwa bambi.—Imil. 20:35.
4. Finshi mwingalandapo pa mulimo mubomba uwa kushimikila?
4 Mwandini lipaalo nga nshi ukulabomba umulimo uucindika Lesa uwalinga fye ukupepwa eka! Umulimo wa kushimikila ulatukosha. Ulaleta amapaalo sana ku babombesha no mweo onse “ukubila sana imbila nsuma.”—Imil. 20:24.