Ifya Kusambilisha Abashaishibisha Ukubelenga
1. Bwafya nshi twingasanga ilyo tulebomba umulimo wa kushimikila?
1 Ilyo tuli mu mulimo wa kushimikila, limo limo tulasanga ubwafya bwa kusambilisha icine ku bantu abashaishibisha ukubelenga. Kuti twacita shani?
2. Kuti twacindika shani abashaishibisha ukubelenga kabili mulandu nshi?
2 Bacindikeni: Icacindama kuli Yehova mutima wa uyo muntu, te masomo yakwe iyo. (1 Sam. 16:7; Amapi. 21:2) Kanshi tatusuula abashaishibisha ukubelenga. Abo bantu bakasumina ukubafwa nga natubacindika no kubatekanishisha. (1 Pet. 3:15) Twilabapatikisha ukubelenga ilembo nangu paragrafu. Ilyo umuntu alelunduluka mu kwishiba kwakwe icine icishaiwamina ica mu Baibolo, akalafwaisha ukuwamyako imibelengele yakwe pa kuti aleipakisha ukubelenga Amalembo “no kulayatontonkanyapo akasuba no bushiku.”—Amalu. 1:2, 3.
3. Ni nshila nshi mwingabomfya pa kusambilisha abashaishibisha ukubelenga?
3 Ifya Kusambilisha Baibolo Abashaishibisha Ukubelenga: Ifikope filabomba bwino sana pa kusambilisha abantu no kubafwa ukwibukisha ifyo balesambilila. Kuti mwaipusha umuntu ifyo alemona mu cikope icili mu lupapulo mulebomfya. Lyena mwipusheni amepusho ya kulungatika pa kumwafwa ukumfwikisha amasambililo yali mu cikope. Belengeni amalembo ayalelanda pa fishinka fili mu cikope. Ifi fikope kuti mwafibomfya na lilya mulepituluka mwi sambililo. Mwilasambilila ifyebo ifingi sana pa nshita fye imo. Komaileni pa cishinka cikalamba icilelandwapo mwi sambililo, kabili mwilaletamo ifyebo fimbi ifishampeneko. Mulebelenga amalembo muli Baibolo, kabili muleipusha amepusho pa kushininkisha ukuti umusambi naumfwikisha ilembo mubelengele. Ici kuti calenga ukuti alefwaisha ukuwamyako imibelengele yakwe pa kuti aleibelengela umwine icine ca mu Baibolo.
4. Kuti twa-afwa shani umusambi wesu ukuwamyako imibelengele yakwe?
4 Ifingafwa Umuntu Ukuwamyako Ukubelenga: Abashaishibisha ukubelenga nangu abashasambilila ukufika apatali balomfwikisha no kwibukisha sana. Kuti mwakoselesha abo bantu ukulakutikisha ilyo bakabelenga bacenjela balebelenga ninshi balekonkamo mu lupapulo lwabo, no kulakonkeleshamo fye mu mashiwi yalebelengwa. Ukucite ici kukafwa umuntu ukuwamyako imibelengele yakwe. Cimbi icingamwafwa katabo ka mutwe wa kuti Sambilileni Ukubelenga no Kulemba. Mu ncende shimo shimo, baeluda kuti bapekanya isukulu lya kuwamyako ukubelenga mu cilonganino. Ishi nshila kuti shatulenga ukwafwa abashaishibisha ukubelenga pa kuti baleumfwikisha “amalembo ya mushilo,” ayaba na maka ya kubalenga aba mano no kubalenga ukupusuka.—2 Tim. 3:15.