Ifyo Twingacita pa Kwafwa Abantu Abashaishibisha Ukubelenga

1. Bwafya nshi bubapo pa kusambilisha Baibolo abantu abashaishibisha ukubelenga?

¹ Abantu bamo abo tusanga pa mayanda ilyo tuleshimikila tabaishibisha ukubelenga lelo balafwaisha ukusambilila Baibolo. Na lyo line, kuti bayumfwa ukuti te kuti bakumanishe ukubelenga Baibolo ne fitabo fimbi. Kanshi nga twabapeela icitabo ca Ico Baibolo Isambilisha pa muku fye wa kubalilapo uo twabatandalila, te kuti bacitemwe sana. Nomba kuti twacita shani pa kuti twafwe abantu ba musango uyu? Twalilandileko na bakasabankanya abekala mu fyalo ifyalekanalekana 20 no kubepusha ifyo bacita. Umfweni ifyo balandile.

2. Finshi twingabomfya pa kwafwa abashaishibisha ukubelenga?

² Nga ca kutila umusambi taishibisha ukubelenga nelyo tabelenga na kubelenga, kuti mwatendekela ukusambilila nankwe muli broshuwa iitila Mulekutika Kuli Lesa nelyo Mulekutika Kuli Lesa pa Kuti Mukekale Umuyayaya. Munyinefwe umo painiya uwikala ku calo ca United States alabala alanga umuntu aya mabroshuwa yonse yabili e lyo amwipusha ukusalapo iyo engatemwa ukusambililamo. Iofeshi lya musambo mu Kenya nalyo lyalandile ukutila abantu balatemwa nga nshi ukusambilila muli aya mabroshuwa pantu mu cifyalilwa fye abena Afrika tabaatemwa ukusambilila ukubomfya amepusho na masuko, lelo ilingi line baatemwa ukubomfya inshimi. Ca cine ukuti abantu abasambilila kuti baatemwa ukusambilila ukubomfya amepusho na masuko, lelo abashasambilila sana bena te kuti batemwe. Nga ca kutila umuntu kuti abelengako panono, bakasabankanya abengi batemwa ukutendekela muli broshuwa ya Imbila Nsuma Ukufuma Kuli Lesa!, Kuti Mwaba Cibusa wa kwa Lesa!, nelyo Icitabo ca Malyashi ya mu Baibolo.

3. Finshi tulingile ukwishiba pa bantu abashaishibisha ukubelenga ifingatwafwa ukubasambilisha bwino?

³ Mulebatasha: Ilingi line abashaishibisha ukubelenga balomfwa insoni nga nshi, kabili balaimona kwati tabacindama. Kanshi ica kubalilapo ico tulingile ukucita kubalenga baleka ukumfwa umwenso ne insoni. Abantu abengi abashaishibisha sana ukubelenga balikwata amano kabili kuti basambilila ifintu. E ico mulingile ukulabalanga ukuti mwalibacindika. (1 Pet. 3:15) Nga balemona ifyo mulebabikako amano no kubatasha, cikabalenga bakatwalilile ukusambilila. Kanshi mwilatendwa ukubatasha.

4. Kuti twakoselesha shani abashaishibisha ukubelenga ukulapekanishisha libela isambililo?

⁴ Nangu ca kuti umuntu taishibisha ukubelenga, mulemukoselesha ukupekanishisha libela isambililo. Bakasabankanya bamo mu South Africa balakoselesha abasambi babo ukulaeba balupwa wabo nelyo ifibusa abaishiba ukubelenga ukulababelengelako. Munyinefwe umo ku Britain ena atemwa ukupeela abo asambilisha Baibolo icitabo cakwe pa kuti bengacibomfyako panono no kumona ifyo cayanguka ukwasuka nga naushila kale amasuko. Munyinefwe umbi na o ku India alakoselesha abo asambilisha Baibolo ukulolesha pa fikope ifili mwisambililo bakasambilila mu mulungu ukonkelepo no kutontonkanyapo sana.

5. Kuti twalanga shani ukuti twalitekanya ilyo tulesambilisha umuntu Baibolo?

⁵ Muletekanya: Te mulandu ne citabo mulebomfya, mulingile ukulanda pa fishinka fikalamba ifilimo, no kwafwa umusambi ukumfwikisha. Pa kubalilapo kuti mulesambilila fye amamineti 10 ukufika kuli 15. Mwilabasambilisha ifingi, mulebasambilisha fye amaparagrafu ayanono. Nga ca kuti umusambi abelenga panono panono, mulingile ukutekanya. Mu kuya kwa nshita nga aya aleumfwikisha ifyo alesambilila no kutemwa Yehova, akatendeka ukulabelenga bwino. Pa kwafwa umusambi ukulabelenga bwino, kuti cawama ukulamwita ku kulongana lilya line fye mwatendeka ukusambilila nankwe.

6. Kuti twa-afwa shani abantu ukwishiba ukubelenga?

⁶ Abasambi nga baishiba ukubelenga balalunduluka bwangu. (Amalu. 1:1-3) Bamunyinefwe na bankashi abengi balyafwa abasambi babo ukwishiba ukubelenga ukubomfya akatabo ka Sambilileni Ukubelenga no Kulemba. Lyonse nga bapwisha ukusambilila, balasambilila na muli aka katabo pa mamineti ayanono. Nga ca kuti atendeka ukumona kwati takeshibe ukubelenga, kuti mwa mwibukishako fimo fimo ifyo asambilile ica kuti no kwishiba aishiba. Mulengeni ukwishiba ukuti Yehova akamupaala pa fyo aleibikilishako ukusambilila Baibolo e lyo no kumukoselesha ukulalomba Yehova ukumwafwa. (Amapi. 16:3; 1 Yoh. 5:14, 15) Bakasabankanya bamo mu Britain balakoselesha abasambi ukuibikila amabuyo ayo bengakumanisha lelo ayengabafwa ukuya baleishiba ukubelenga. Yamo pali aya mabuyo kusungila alufabeti, ukwishiba ukufwaya amalembo yamo no kuyabelenga, e lyo no kubelenga impapulo umwaba amashiwi aya yanguka. Pa kusambilisha umuntu ukubelenga mulingile no kumwafwa ukufwaisha ukwishiba ukubelenga, te kulamusambilisha fye ifya kubelenga.

7. Mulandu nshi tushilingile ukumwena kwati abashaishiba ukubelenga te kuti basambilile icine?

⁷ Yehova tasuula abantu abashasambilila. (Yobo 34:19) Ico Yehova abikako amano mutima wa muntu. (1 Imila. 28:9) Kanshi mwilasuula ukusambilisha abantu abashaishibisha ukubelenga. Kwaliba impapulo ishingi ishingamwafwa. Mu kuya kwa nshita kuti mwatendeka ukusambilila mu citabo ca Ico Baibolo Isambilisha kabili ici kuti calenga umusambi aumfwikisha amalembo.