Umukululo wa Mepusho

◼ Bushe kuti caba fye bwino ku filonganino nangu ku bantu fye ukubomfya ifishibilo fya tubungwe twa mwi funde utwa Nte sha kwa Yehova?

Icishibilo kuti caba lishina lya kabungwe nangu icintu fye cimbi icilenga ukuti ako kabungwe kaleishibikwa bwangu. Icishibilo ca kabungwe ka Watch Tower cimininako akabungwe ka Watch Tower Bible and Tract Society of Pennsylvania no tubungwe twa mwi funde tumbi uto ukuteyanya kubomfya. Pa mapepala ya makalata ayo akabungwe ka Christian Congregation of Jehovah’s Witnesses kabomfya paba icishibilo ca Baibolo iyakupukulwa. Utubungwe twa mwi funde tumbi uto Inte sha kwa Yehova shibomfya na to twali-ikwatila ifishibilo fya tuko.

Ifilonganino nangu abantu fye tabafwile ukubomfya ifishibilo nangu amashina ya tubungwe twa mwi funde utwa kuteyanya nangu ifyapalana sana ne fishibilo fya kuteyanya, pa fishibilo fyabo ifya Mayanda ya Bufumu, pa makalata yabo, pa fipe fyabo, na pa fintu fye fimbi. Ukubomfya ifishibilo fya kuteyanya icibomfyebomfye kuti kwafulunganya abalashi ba buteko, bakasabankanya, na bantu fye bambi abengafwaya ukwishiba akabungwe ka mwi funde ako icilonganino cabamo pa tubungwe twalembeshiwa kale. Na kabili abantu kuti balemona kwati amakalata balepokelela yalefuma ku maofeshi yakalamba aya Nte sha kwa Yehova nangu ku maofeshi yanono aya kuno mwesu.

Icishibilo ca kabungwe ka Watch Tower, nangu icapalako, tacifwile ukubomfiwa pa Mayanda ya Bufumu ayakalakuulwa ku ntanshi nangu ca kutila ayo Mayanda ya Bufumu kuti yalembeshiwa mwi shina lya Watch Tower. Ifilonganino ifyakuula kale Amayanda ya Bufumu no kubikapo ici cishibilo tabafwile ukufumyapo icishibilo ili line pantu uyu mulimo kuti wakabila ukukuulula ifibumba apengafwaikwa inshita, ukubombesha ne ndalama. Lelo kuti mwafumyapo icishibilo nga ca kuti ukucite ifyo takulekabila ukukuululula ifikulu fikulu. Nga ca kuti umulimo naukula sana kuti mwalolela mpaka inshita ilyo mukalawamya icikuulwa conse nangu icishibilo ca Ng’anda ya Bufumu.