Lumbanyeni Yehova Cila Bushiku
1. Cinshi ico ababomfi ba kwa Lesa bakoseleshiwa ukulacita, kabili mulandu nshi?
1 Imfumu Davidi alilangilile ifyo abikile amano ku kulumbanya Yehova “akasuba konse,” nangu fye umuyayaya. (Amalu. 145:2, 7, 21) Kwaliba icilenga ukuti na ifwe bene tulelumbanya Yehova cila bushiku.—Amalu. 37:10; 145:14, 18; 2 Pet. 3:13.
2. Finshi ifyo nalimo indupwa shingalacita pa kuti balelumbanya Yehova cila bushiku?
2 Pa Ng’anda: Twalikwata impapulo ishisuma sana ishingatwafwa ukulanshanya pali Lesa na pali Baibolo ilyo tulelanshanya ilembo lya bushiku, ilyo tuli pa Mapepo ya Lupwa, na lintu tulepekanya ukulongana. Abengi abakwata indupwa balitemwa ukulila pamo ica kulya nangu fye umuku umo cila bushiku. Ukulila pamo ica kulya kulalenga bakwata inshita ya kulanshanya mu mutekatima no kulumbanishisha Yehova capamo. Abafyashi nga balelanshanya na bana babo pa fyebo ukufuma muli ishi mpapulo kuti babakusha “ukulingana no kusalapula kwa kwa Yehova.”—Efes. 6:4; Amala. 6:5-7.
3. Bushe lishuko nshi tukwata ilyo tuli na bamunyinefwe?
3 Pamo na Bamunyinefwe: Ilyo tuleshimikila nelyo ilyo tulelongana, ilaba ni nshita iisuma nga nshi iya kulumbanya Yehova capamo na Bena Kristu banensu. (Amapi. 15:30; Fil. 4:8; Heb. 13:15) Apo bonse twalitemwa Yehova, kanshi ilyo tulelanshanya cilanguka ukutasha Yehova mu bufumacumi pa fisuma ifyo atucitila.—Amalu. 106:1.
4. Ni nshita nshi shimo shimo ilyo twingalumbanya Yehova?
4 Ilyo Tulelanda ku Bashili ba Nte: Nalimo kuti kwaba ifingalenga ukuti tufilwe ukulashimikila imbila nsuma cila bushiku, lelo ukulalandako fye panono pali Yehova na pa fyo afwaya ukucita ku ntanshi kubo tubomba nabo, ku bana be sukulu banensu, e lyo na kuli bambi abo tuba nabo kuti kwalenga abantu abafuuka ukuba ne subilo. (Amalu. 27:14; 1 Pet. 3:15) Ilyo nkashi umo aali mu ndeke ashimikile ku mwanakashi uo baali nankwe. Uyu mwanakashi alyumfwile bwino kabili alitemenwe pa fyo bamushimikile kuli nkashi. Ici calengele ukuti apeele nkashi adresi ne namba ya foni pa kuti bakaletumishanya. Ilyo amafya mu calo yalefulilako ne fintu ukulabipilako fye, abantu ba kwa Yehova bena batwalilila fye ukulashimikila “imbila nsuma iya fintu ifisuma” ku bantu abafwaya ukumfwa. Ukushimikila abantu kulalenga baba ne subilo no kutendeka ukulumbanya Yehova.—Esa. 52:7; Rom. 15:11.
5. Cinshi tufwaila ukulalumbanya Yehova, kabili nga tulemulumbanya ninshi finshi tulecita?
5 Yehova afwile alatemwa nga aumfwa ababomfi bakwe balemulumbanya cila bushiku! Nga filya fine ifibumbwa fya kwa Yehova ifyo tumona fimulumbaanya, na ifwe kuti tulemulumbanya cila bushiku mu mayanda yesu, mu cilonganino, na lintu tulelanda kuli bambi abashilati batampe ukulumbanya Yehova nga ifwe.—Amalu. 19:1-4.