“Lekeni Umupashi Umulenge Ukucincila”
1. Tufwile ukuba shani ilyo tulebomba umulimo wa kushimikila?
1 Fwe Bena Kristu tufwile ukuba abacincila mu milimo yonse iya Bwina Kristu. Na kuba batukoselesha ukuti “lekeni umupashi umulenge ukucincila” kabili “bombeleni Yehova.” (Rom. 12:11) Nangu cibe fyo, kwaliba ifingi ifilenga tuleke ukubombesha mu mulimo wa kushimikila. Bushe kuti twacita shani pa kuti tube abacincila ‘kwati mulilo uulebilima’ ilyo tulebomba umulimo wa kubila Ubufumu?—2 Tim. 1:6, 7.
2. Bushe ukuisambilisha Baibolo kwayampana shani no kuba abacincila mu kushimikila?
2 Tuleisambilisha Fwe Bene: Kashimikila wa Bufumu uusambilisha bwino ni uyo uwatemwa amafunde ya kwa Lesa kabili alayomfwa bwino sana. (Amalu. 119:97) Nga twaumfwikisha icine ilyo tuleisambilisha Baibolo, kuti calenga twacincila mu mulimo. Nga twatemwa uutusambilisha icine ca musango yu kabili no kufwaya ukwebako bambi imbila nsuma cilalenga twalalumbanya Lesa e lyo no kulumbula ishina lyakwe apabuuta. (Heb. 13:15) Kanshi nga tuleshimikila imbila nsuma no mweo onse ninshi tulelanga ukutila twalicindika sana ifyo Baibolo isambilisha.
3. Bushe umupashi wa kwa Lesa kuti watwafwa shani mu mulimo wesu uwa kushimikila?
3 Lombeni Umupashi wa kwa Lesa: Pa kuti tulesambilisha bwino tatufwile ukushintilila pa maka yesu. Lelo umupashi wa kwa Lesa e wingatulenga ukuba abacincila icine cine. (1 Pet. 4:11) Nga twapalama ku mwine wa ‘maka ayengi’ kuti atukosha ica kuti no kushipa twashipa pa kushimikila. (Esa. 40:26, 29-31) Ilyo umutumwa Paulo alekwata amafya mu kushimikila, ‘Lesa alemwafwa.’ (Imil. 26:21, 22) Umupashi wa kwa Yehova uupeela amaka kuti watwafwa ukuba abacincila mu mulimo wa kushimikila, e co kanshi tufwile ukulalomba Lesa ukutupeela uyu mupashi.—Luka 11:9-13.
4. Cinshi cingacitika nga tuli abacincila mu kushimikila, lelo finshi tufwile ukulaibukisha?
4 Ukuba abacincila sana mu kushimikila pa Bufumu ilingi line kulalenga na Bena Kristu bambi na bo ukuba abacincila nga nshi. (2 Kor. 9:2) Abantu mu cifulo tushimikilamo kuti batemwa ukukutika ku bukombe tubatwalila nga ca kuti tuli abacincimuka pa kulanda kabili natwishiba bwino bwino ifyo tulelanda. Nangu cibe fyo, tatufwile ukuba fye abacincila, lelo tufwile no kuba abalamuka kabili abafuuka. (Tito 3:2) Lyonse tufwile ukupeela umucinshi abo tulelanda na bo kabili tatufwile ukulabapatikisha.
5. Kufunda nshi ukwaba mu Baibolo uko tufwile ukulakonka?
5 Apo tuli bakabila ba Bufumu, lekeni ‘umupashi ulelenga tuleba abacincila’ lyonse. Pa kuti tube abacincila, lekeni tuleisambilisha Baibolo no kulapepa lyonse kuli Yehova uwingatupeela umupashi wa mushilo uwakwatisha amaka. Nga tulecita ifyo, tukaba abacincila mu mulimo wesu uwa kushimikila pantu tukalakwata ‘umupashi wa mushilo kabili ifyo tukalalanda fikalaba ifyashininkishiwa icine cine.’—1 Tes. 1:5.