Muli iyi Nshita ya Cibukisho, Bushe Mukapashanya Ukupimpa kwa kwa Yehova na Yesu?

1. Finshi ifyo Inte sha kwa Yehova besha na maka ukucita mu nshita ya Cibukisho?

¹ Pa Kufikilisha ubufwayo bwakwe Yehova alapimpa. Pa numa ya kulanda pa mapaalo yamo ayo Ubufumu bwa kwa Lesa bukaleta, ilembo lya kwa Esaya 9:7 litila: “Ukupimpa kwa kwa Yehova wa mabumba kukacita ici.” E fyo no Mwana wa kwa Lesa acitile ilyo alebomba umulimo wa kushimikila pano isonde, alangile ukuti ali uwapimpa mu kupepa kwa cine. (Yoh. 2:13-17; 4:34) Cila mwaka mu nshita ya Cibukisho, bakasabankanya isonde lyonse balesha na maka ukupashanya ukupimpa kwa kwa Yehova na Yesu pa kubombesha mu mulimo wa kushimikila. Bushe na imwe te kuti mutemwe ukwingilishako imibombele yenu?

2. Bushe ukutendeka pa 7 March tukalanga shani ukuti twalipimpa?

² Ukulalika Abantu Ukusangwa ku Cibukisho: Uno mwaka tukatendeka ukulalika abantu ku Cibukisho pa Cibelushi pa 7 March. Ino e nshita ya kuipekanya pa kuti mukashimikileko mu kupimpa. Abantu mu filonganino bakaba ne nsansa sana ilyo bakalashimikila ku bantu bonse ababa mu cifulo cabo ica kushimikilamo. Mukabombeshe pa kuti mukalalikeko abo mubomba nabo, balupwa wenu, abo musambilila nabo, ifipempu, e lyo na bantu bambi abo mwaishiba.

3. Finshi tukacita pa kuti tukabombeshe mu March na mu April?

³ Ukubombako Bupainiya bwa Kwafwilisha: Nga tuli abapimpa tukafwaisha ukubombesha sana mu mulimo wa kushimikila. Ukwabula no kutwishika, abengi bakabombako bupainiya bwa kwafwilisha mu March na April, pantu kukaba no kubomba bupainiya bwa ma-awala 30. Ilyo muli pa mapepo ya lupwa nelyo ilyo muleisambilisha, mulepepa ukuti mukabombeshe. (Amapi. 15:22) Nga ca kuti mulefwaisha ukubombesha muli iyi kapeni kuti mwalenga na bambi nabo balafwaya ukubombesha. Nga mwapekanya bwino pa kuti mukabombeshe muli iyi myeshi, ninshi mulepashanya ukupimpa kwa kwa Yesu.—Marko 6:31-34.

4. Mapaalo nshi yaba mu kupashanya ukupimpa kwa kwa Yehova na Yesu?

⁴ Nga ca kuti muli iyi nshita ya Cibukisho twapashanya ukupimpa kwa kwa Yehova na Yesu tukapaalwa icine cine kabili abengi mu cifulo tushimikilamo bakomfwra imbila nsuma. Na kabili, tukaba ne nsansa ishaba mu kubombela Yehova e lyo ne shaba mu kupeelako bambi. (Imil. 20:35) Ne cacindamisha ca kuti tukalenga Lesa no Mwana wakwe ukusekelela.