Mulepangila Libela Ifyo Mukacita mu Nshita ya Cibukisho

Cila mwaka, abantu ba kwa Yehova balafwaisha ukulongana pamo pa kwibukisha imfwa ya kwa Yesu. Imilungu ya kubalilapo ilyo kushilaba Icibukisho na pa numa ya Cibukisho, ilaba ni nshita iisuma iya kulumbanya Yehova no ku mutasha pa kutupeela icilubula, ubupe ubusuma nga nshi. (Efes. 1:3, 7) Ku ca kumwenako, tulabombesha ukwita abantu ukwisasangwa ku Cibukisho. Bamo balalulako amaprogramu yabo pa kuti bakabombeko bupainiya bwa kwafwilisha ubwa ma-awala 30 nelyo 50 mu March nelyo April. Bushe kuti mwatemwa ukulundako inshita mubomba mu mulimo wa kubila imbila nsuma mu nshita ya Cibukisho uno mwaka? Finshi fingamwafwa pa kuti mukabombe bwino?

Ilingi line, nga twatantika bwino ifya kucita, tulabomba imilimo iingi. (Amapi. 21:5) Apo inshita ya Cibukisho ilepalamina, ino e nshita ya kutendeka ukuipekanya. Tontonkanyeni pa fyo mwingacita pa kuti mukabombeshe mu mulimo wa kubila mbila nsuma, ne fyo mufwile ukucita pa kuti mukafishepo ifyo mulepanga. Lyena lombeni Yehova ukuti apaale ifyo mulepanga ukucita.—1 Yoh. 5:14, 15.

Bushe kuliko ifyo mulemona ukuti e fyo mwingacita pa kuti mukabombeshe mu mulimo wa kubila imbila nsuma mu nshita ya Cibukisho?