Inshita ya Cibukisho—Ni Nshita ya Kubombesha!
1. Fintu nshi ifikalenga tukabombeshe mu myeshi ya March, April, na May?
1 Bushe kuti mwabombesha mu myeshi iileisa iyo tukwatilamo Icibukisho? Mu ncende ishingi, inshiku sha kulaca bwino kabili akasuba takakulawa bwangu. Bakasabankanya bamo ababomba bakaba pa cuti na bana ba masukulu bakafunga amasukulu yabo, e ico bakabomfya iyi nshita ukulashimikila sana. Ukutendeka pa 2 April tukatampa kampeni yaibela iya kwita abantu ukwisasangwa ku Cibukisho icikabako pa 17 April. Lyena pa numa tukabombesha ukukoselesha abasangilwe ku cibukisho ukuti bakesekutika ku lyashi lyaibela ilikabako mu mulungu wa April 25. Cine cine kuli ifintu ifingi ifingalenga twafwaya ukubombesha mu myeshi ya March, April, na May.
2. Cinshi mwingacita icawamisha nga mulefwaya ukubombesha umulimo wa kushimikila?
2 Bupainiya Bwa Kwafwilisha: Icawamisha ico mwingacita nga mulefwaya ukubombesha, kubombako bupainiya bwa kwafwilisha. Apo bonse twalikwata ifya kucita ifingi, pa kuti tukabombeko tufwile ukutantikila libela no kwalulako fimo fimo ifyo tucita. (Amapi. 21:5) Nga ca kuti kwaliba ifyo mucita lyonse lelo ifishacindama sana, limbi kuti mwasalapo ukuficita inshita imbi. (Fil. 1:9-11) Kuti mwaebako na bambi mu cilonganino ukuti mulefwaya ukubombako bupainiya pa kuti mumone nga kuti batemwa ukubomba na imwe!
3. Bushe ababa mu lupwa kuti bacita shani nga balefwaya ukubombesha?
3 Ilyo mukakwata Amapepo ya Lupwa ayakakonkapo, kuti cawama ukulanshanya ifyo mupanga ukucita capamo no lupwa lonse. (Amapi. 15:22) Nga ca kuti bonse mwaumfwana, bamo mu lupwa kuti babombako bupainiya bwa kwafwilisha umweshi umo nelyo ukucilapo. Cinshi mwingacita nga mwasanga ukuti te kuti mukwanishe? Napamo bonse kuti mwalundako inshita mushimikila lintu mulebombako umulimo wa kushimikila inshita ya cungulo, nelyo ukubomba ama-awala ayengi pa mpela ya milungu.
4. Mapaalo nshi tukwata nga twabombesha umulimo wa kushimikila mu nshita ya Cibukisho?
4 Yehova aleshiba fyonse ifyo tucita pa kumubombela kabili alatasha ukuipeelesha kwesu. (Heb. 6:10) Icilenga tuleba ne nsansa kupeela Yehova e lyo no kwafwa abantu bambi. (1 Imila. 29:9; Imil. 20:35) Bushe kuti mwabombesha mu nshita ya Cibukisho pa kuti mukabe ne nsansa ishingi na mapaalo ukufuma kuli Yehova?