Bushe Mukabombako Bupainiya bwa Kwafwilisha?

1. Cinshi ciwamina ukubombesha mu mulimo wa kushimikila mu nshita ya Cibukisho?

¹ Inshita ya Cibukisho, ni nshita iisuma iya kubombesha mu mulimo wa kushimikila. E nshita tutontonkanya sana pa kutemwa kwa kwa Yehova ukukalamba ukwalengele atume Umwana wakwe ku kwisatulubula. (Yoh. 3:16) Tulatasha sana pali ici kabili cilalenga tulefwaisha ukwebako bambi pali Yehova na pa fyo alecitila abantunse. (Esa. 12:4, 5; Luka 6:45) Na kabili e nshita tuipakisha ukwita ifibusa na bantu ababa mu cifulo tushimikila ukwisasangwa ku Cibukisho. Pa numa ya Cibukisho, tulafwaya ukwafwa abasangilweko ukutwalilila ukusambilila Baibolo. Bushe tamwakabombeko bupainiya bwa kwafwilisha mu March, mu April nelyo mu May pa kuti mukashimikile sana?

2. Cinshi umweshi wa March ukawamina sana ukubombamo bupainiya bwa kwafwilisha?

² Ipekanyeni Ukubombesha mu March: Mu March mukawama sana ukubombako bupainiya bwa kwafwilisha. Abakalembesha bupainiya bakasala nga balefwaya ukubomba ama-awala 30 nelyo 50. Kangalila wa muputule nga akatandalila icilonganino cenu mu March, abakalabombako bupainiya bwa kwafwilisha nabo kuti basangwako inshita yonse iyo kangalila akakumana na bapainiya ba nshita yonse na baibela. Kampeni ya kushiila abantu utupepala twa kubetilapo ku Cibukisho ikakokolako ukucila imyaka yafumako pantu ikatendeka pa March 1, e lyo Icibukisho cikabako pali Cibili pa March 26, 2013. E lyo mu March mukaba Ifibelushi ne nshiku sha Mulungu 5. Kanshi kuti cawama mwatontonkanyapo sana pa fyo mwingacita pa kuti mukabombeshe muli uyu mweshi wacindama.

3. Finshi twingacita pa kuti tukabombeshe mu mulimo wa kushimikila?

³ Tendekeni Ukupekanya: Ino ine, e nshita ya kutampa ukumona ifyo mwingacita pa kuti mwaisabombako bupainiya. Ulupwa lufwile ukubombela pamo, e ico pa Mapepo ya Lupwa, lanshanyeni ifyo mulepanga ukucita kabili tantikeni ifyo mukabomba. (Amapi. 15:22) Nga te kuti mubombeko bupainiya, tamufwile ukumfwa ububi. Kuti cawama mwateyanya bwino ifya kucita pa kuti mukalebomba ama-awala ayengi pa nshiku muya mu kushimikila. Nalimo kuti mwasalapo ubushiku na bumbi mu kati ka mulungu ubwa kuya mu kushimikila.

4. Fisuma nshi fikafuma mu kubombesha mu March, mu April, na mu May?

⁴ Nga twabombesha mu March, mu April, na mu May, cikawama icine cine kabili tukakwata sana insansa ishifuma mu kubombela Yehova e lyo no kwafwa bambi. (Yoh. 4:34; Imil. 20:35) Ne cacindama ca kuti Yehova akasekelela sana nga twaipeelesha ukumubombela.—Amapi. 27:11.