Tampeni Ukuipekanya pa Kuti Mukabombeshe mu Mulimo

1. Lishuko nshi tukwata mu nshita ya Cibukisho, kabili kuti twaipekanya shani?

¹ Lyonse inshita ya Cibukisho ilalenga twakwata ishuko lya ‘kulumbanya sana Yehova.’ (Amalu. 109:30) Bushe te kuti mubombeshe mu mulimo mu March pa kuti mulange ukuti mulatasha Lesa uwatupeele icilubula? Nomba ino e nshita ya kutendeka ukuipekanya.—Amapi. 21:5.

2. Bushe imwe na bantu bambi mwacitile shani ilyo bacefesheko ama-awala ya bapainiya ba kwafwilisha mu April?

² Bupainiya bwa Kwafwilisha: Umwaka wapwile, abantu mu filonganino ifingi balitemenwe nga nshi ilyo babilishe ukuti nabacefyako ama-awala ya bapainiya ba kwafwilisha mu April. Munyina umo alembele ukuti: “Ncili ku sekondari, kabili nalifilwa ukusanga inshita ya kubomba bupainiya bwa nshita yonse. Lelo nkalembesha ukubombako ama-awala 30 kabili nkabombesha pa kuti nkafishe ama-awala 50 mu mweshi wa April.” Nkashi umo uubomba incito alembele ukuti: “Te kuti mfilwe ukubomba ama-awala 30!” Ilyo babilishe ukuti nabacefyako ama-awala ya bapainiya ba kwafwilisha, nkashi uwabombeleko bupainiya bwa nshita yonse uuli nomba mu ma 80, atile: “Ala iyi e nshita nalelolela! Yehova alishibe ukuti nalitemenwe sana bupainiya!” Bambi nabo abashakumanishe ukubombako bupainiya bwa kwafwilisha balibombeshe mu mulimo.

3. Mulandu nshi mwingafwaila ukubombela bupainiya bwa kwafwilisha mu March, April, na May?

³ Umweshi wa March ukaba mweshi uusuma uwa kubombako bupainiya bwa kwafwilisha pantu na kabili kukaba ukusalapo kubomba ama-awala 30 nelyo 50. E lyo, ukutendeka pa Cibelushi, pa 17 March, tukabombako kampeni yaibela iya kwita abantu ukusangwa ku Cibukisho icikabako pa 5 April. Abengi bakaipakisha ukubomba bupainiya bwa kwafwilisha ica kuti bakafwaya ukubombako na mu myeshi ya April na May ilyo bakalabomba ama-awala 50.

4. Kuti twacita shani pa kuti tukabombeshe mu mulimo, kabili finshi fingafumamo?

⁴ Ilyo mukakwata Amapepo ya Lupwa, kuti mwalanshanya ifyo umo umo mu lupwa engabombesha mu mulimo mu nshita ya Cibukisho. (Amapi. 15:22) Lombeni Yehova ukuti akapaale ukubombesha kwenu. (1 Yoh. 3:22) Ilyo mulebombesha mu mulimo, mukalalumbanya Yehova e lyo mukakwata ne nsansa ishingi.—2 Kor. 9:6.