Umukululo wa Mepusho

◼ Bushe Inte sha kwa Yehova bafwile ukulapeelako bambi ifyebo nelyo amalyashi ifyo bakopa?

Tulakoseleshiwa ukumfwa amalyashi ya Baibolo. (Imil. 15:32) Kanshi e mulandu wine tufwaila ukwebelako abashasangilwe ku kulongana ifi fyebo ifya kukoselesha. Apo nomba kwaliba ifyalekanalekana ifya kubomfya pa kukope fyebo, kuti mwakopa ilyashi no kutuminako abantu bambi ukwabula ubwafya. Bamo balisunga amalyashi ayengi ayo bakopela limo, ukubikapo na malyashi ayalandilwe imyaka iingi iyapita, kabili balashimishako bambi aya malyashi nelyo ukukopolwelako ifibusa fyabo pa kuti nabo bakoseleshiwe. Bambi nabo balibika aya malyashi pa Intaneti pa kuti abali bonse baleikopolwela abene.

Kwena tacalubana ukukopa amalyashi pa kuti tulekutikako fwe bene nelyo ulupwa lwesu. E lyo kabili, baeluda kuti bapekanya ukuti kuleba ukukopa amalyashi pa kuti abalwala mu cilonganino abashingaya ku kulongana balekutikako. Lelo kwaliba imilandu iisuma iyo tushilingile ukusabankanishisha ifyebo ifyo bakopa nelyo amalyashi.

Pa mulandu wa kuti amalyashi bapeela pa kulongana bapekanya ukulingana ne fyo balekabila kuli ico cifulo, nga tulesabankanya ifi fyebo kuti twasuka twalanda ne fyebo ifyapusana ne fyo ilyashi lili, pantu tatwishibe icalengele ukuti balande ili lyashi. E lyo kabili, kuti cayafya ukwishiba uwapeele ilyashi na lintu alandile ili line lyashi, pa kutila na ifwe tucetekele ukuti ifi fyebo fya cine kabili nafilingana ne fyo twaishiba pali ino nshita. (Luka 1:1-4) Na kabili ukukopolole fyebo nelyo ukukopa amalyashi, no kutendeka ukulafisabankanya kuti kwalenga bamo ukulapeela nelyo ukupokelela umucinshi uwacilamo.—1 Kor. 3:5-7.

Umusha wa cishinka kabili uwashilimuka alabombesha ukutupekanishisha ifya kulya “pa nshita yalinga.” (Luka 12:42) Ukupeela ifya kulya pa nshita yalinga kusanshamo no kupekanya amalyashi aya kulanda mu filonganino fya Nte sha kwa Yehova ukubikapo ne fyebo ifyo bakopa amashiwi ifyaba pa Intaneti ifyo abantu bengakopolola pa adresi ya jw.org. Tulekabila ukucetekela ukuti umusha wa cishinka kabili uwashilimuka ukubikapo na bemininako uyu musha, e kutila Ibumba Litungulula bakatwalilila ukutupeela ifyo tukabila pa kuti tube abakosa mu citetekelo.—Imil. 16:4, 5.