Ifyo Mwingalafibomfya Ifyebo Ifyo Bakopa fye Amashiwi
1. Ukulunda pa mpapulo ishipulintwa, ni finshi fimbi ifyo twakwata ifingatwafwa?
1 Abengi balitemwa ukubomfya Webu saiti ukubelenga amashiwi ayasuma kabili ayalungama aya cine. (Luk. Mil. 12:10) Na lyo line, bushe mulabomfya ifyebo fya mashiwi fye ifyo bakopa? Ukucita ifi kulalenga mwakutika ku fyebo ifingi ifyaba pa Webu saiti yesu. Bushe kuti twanonkelamo shani mu fyebo ifyo bakopa ifya mashiwi fye?
2. Kuti twabomfya shani ifyebo ifyo bakopa fye amashiwi pa lwesu na pa mapepo ya lupwa?
2 Pa Lwesu na pa Mapepo ya Lupwa: Ukulakutika ku fyebo ifyo bakopa fye amashiwi ya mu Baibolo, aya muli magazini nelyo mu lupapulo ilyo tuli pa bulendo nangu ilyo tulebomba incito shimbi kuti kwatwafwa ukulabomfya bwino inshita. (Efes. 5:15, 16) Fingi twingacita pa mapepo ya lupwa pamo nga ukulakutika ku lyashi ilyo babelengela libeela e lyo tulekonkamo na ulo lwine lupapulo babelenga. Ukulakutika ku fyebo ifyo bakopa fye amashiwi pe sambililo lya pa lwesu kuti kwatwafwa maka maka nga tulefwaya ukulabelenga bwino nelyo nga tulesambilila ululimi lumbi.
3. Ni bani mu cifulo tushimikila abengatemwa ukukutika ku malyashi ayo bakopa fye amashiwi?
3 Ilyo Tuleshimikila: Abantu abalanda ukuti balipamfiwa mu cifulo tubilamo imbila nsuma nalimo kuti batemwa ukukutika ku fyebo ifya mashiwi ifyo bakopa fye. Nelyo kuti twakumanya umuntu uulanda ululimi lumbi kabili uwingatemwa ukukutika ku mbila ya Bufumu mu ‘lulimi lwakwe.’ (Imil. 2:6-8) Mu ncende shimo, ukukutika kwalicindama sana ukulingana ne ntambi shabo. Ku ca kumwenako, lutambi ku bena Hmong ukulashimikilako abana kukula ilyashi lya kale kabili tabalaba ifyo bakutikeko, balafibukisha fyonse. Na abantu abengi nabo balitemwa ukusambilila ilyo balebashimikila fye amalyashi.
4. Fipusho nshi tufwile ukuyipusha ilyo tulefwaya ukulayafwa abantu mu cifulo tubilamo imbila nsuma?
4 Mu cifulo mushimikila, bushe te kuti ciwame ukulishishako abo muleshimikilako ifyebo ifyo bakopa fye amashiwi mu lulimi ulo mulelanda nabo? Bushe te kuti umuntu anonkelemo ukumutuminako pa e-mail amalyashi nelyo ifyebo bakopa fye amashiwi pa kuti akutikako? Bushe te kuti tukopolole ifyebo bakopa fye amashiwi ifya lupapulo lumo no kufibika pa CD e lyo twapeela no muntu uulefwaya ukulasambilila icine, nalimo no kumupeelela pamo na ulo lwine ulupapulo bapulinta? Icitabo icili conse, broshuwa, trakiti, nelyo magazini iyo bakopa fye amashiwi nga twacikopolwela pa CD no kupeela umuntu ilyo tulebila imbila nsuma tufwile ukupenda ukuti twashalika. Ifyebo ifyo bakopa fye amashiwi bafipekanishisha ukuti tulefibomfya pa masambililo ya pa lwesu e lyo na lintu tulelimba imbuto sha cine ca Bufumu.—1 Kor. 3:6.