Ifyo Mwingacita pa Kuti Mulebelenga Baibo Cila Bushiku

Bushe cilamukosela ukubelenga Baibo cila bushiku pa mulandu wa kuti mwalikwata ifya kucita ifingi? (Yosh. 1:8) Nga cilamukosela, kuti mwaeshako ukucita ifi:

• Mulekwata ifya kumwibukishako. Mulebika ifya kumwibukishako pali foni nelyo pali tabuleti pa kuti filemwibukishako ukubelenga Baibo.

• Mulebika Baibo apo mwingalaimona. Nga ca kuti mubelenga muli Baibo iyapulintwa, muleibika apo mwingalaimona cila bushiku.—Amala. 11:18.

• Mulekutika Baibo iyo babelenga. Mulekutika Baibo iyo babelenga ilyo mulebomba imilimo ya pa ng’anda. Nkashi Tara painiya, uwakwata abana kabili uubomba ubushiku alandile ati: “Nga ndekutika Baibo iyo babelenga ilyo ndebomba imilimo ya pa ng’anda, cilanyangukila ukubelenga Baibo cila bushiku.”

• Tamufwile ukunenuka. Nga ca kuti kwaba fimo ifyalenga mwafilwa ukubelenga Baibo ukulingana ne fyo mwatantika, kuti cawama mwabelengako ifikomo ifinono ilyo mushilalaala. Nangu mulebelenga fye ifikomo ifinono cila bushiku, mukalasambililako fimo.—1 Pet. 2:2.