Bushe Ndabombesha mu Mulimo wa Kushimikila?
1. Fintu nshi pambi ifingasakamika Umwina Kristu wa cine?
1 Bushe mwaliipushapo ici cipusho? Nakalimo pali ino nshita tamubomba umulimo wa kushimikila nge fyo mwalebomba kale pa mulandu wa kuti namukula, nelyo mulalwalilila atemwa balupwa abo mulesakamana nabafula sana. Nkashi umo uwakwata abana batatu alembele ukuti, limo limo alomfwa ububi pantu inshita iyo apoosa ku kusakamana ulupwa lwakwe ikalamba ica kuti inshita iishalako ku kubomba umulimo wa kushimikila ilacepa. Bushe cinshi cingatwafwa ukusakamana ulupwa e lyo no kulabomba umulimo wa kushimikila?
2. Bushe cinshi Yehova enekela ilyo tulemubombela?
2 Ico Yehova Enekela Ukuti Tulecita: Kwena, ifwe bonse kuti twatemwa ukubombesha mu mulimo wa kushimikila. Lelo paliba ubupusano ubukalamba pa kufwaya ukubombako umulimo e lyo no kubombako kwine. Apo tulafwaya ukubombesha cilangilila fye ukuti tatuli banang’ani. Tulingile ukwishiba ukuti Yehova alishiba apo twingapesha ukubomba kabili tenekela ifwe ukubomba ukucila pa maka yesu. (Amalu. 103:13, 14) Bushe Yehova enekele ifwe ukubomba ukufika pi? Afwaya ukumubombela no mweo onse, apapela amaka yesu.—Kol. 3:23.
3. Finshi twingacita pa kuti twishibe nga kuti twabombesha mu kushimikila?
3 Bushe cinshi icikalenga twishibe bwino ukutila, kuti twabombesha mu mulimo wa kushimikila? Kuti twapepa kuli Yehova pa kuti atwafwe ukumona nga cine cine kuti twabombesha. (Amalu. 26:2) Umwina Kristu munensu uwakosa uwatwishiba bwino, kabili uushingatiina ukutweba umo twingawamya, na o kuti atwafwa. (Amapi. 27:9) Cimbi na co ca kuti, apo ifintu filaaluka, kuti cawama ukulaiceceeta cila nshita pa kuti tumone nga kuti twabombesha mu mulimo wa kushimikila.—Efes. 5:10.
4. Bushe tufwile ukumona shani ifya kutucinkulako ifyaba mu Baibolo ifilanda pa kushimikila?
4 Ifyo Tufwile Ukumona Ifya Kutucinkulako: Nga kuli ukucimfyanya kwa balebutuka ulubilo ilingi line kulaba na balelumba abakoselesha abalebutuka. Umulandu kubela abalelumba, kukoselesha abalebutuka pa kuti bafike ku mpela, te kubatompola nakalya. E cimo cine ne fyebo fya kutukoselesha ifyaba muli Baibolo e lyo ne fya kutucinkulako ifyo tumfwa pa kulongana na mu mpapulo shilanda ifyaba muli Baibolo, fyonse filatukoselesha ‘ukubila icebo mu kucincila,’ kabili tulamwenamo. Lelo ici tacipilibula ukuti ukubombesha kwesu takwafikapo iyo. (2 Tim. 4:2) Kuti twacetekela ukuti nga twatwalilila ukubombesha, Yehova takalabe ‘umulimo wesu no kutemwa,’ kwesu kabili akatupaala.—Heb. 6:10.